Back to Top
Responsive image
E korant di pueblo

E gran dia a yega !: Kòrsou ta topa Guatemala awe den SDK


June 8, 2021 • 2 minüt pa lesa

Patrick Kluivert dunando instrukshon na nos futbolistanan ayera nochi.

WILLEMSTAD—Awe djamars dia 8 yüni 2021, ta fecha pa e partido tan sperá, ora ku e selekshonnan di Kòrsou i Guatemala topa otro den wega bálido pa Grupo C di Concacaf.

Ta trata aki di ekiponan ku ta komandá e grupo, ámbos ku 9 punto, unda tur 2 tambe tin un saldo di 14 gol, unda Kòrsou a anotá 15 i risibí 1 kontra i Guatemala a anotá 14 sin risibí gol kontra. Debí di tin mas gol anotá, ofisialmente Kòrsou ta na promé puesto i tin sufisiente na un empate pa sigui pa e di 2 buèlta klasifikatorio di Concacaf, rumbo Qatar 2022.

Pa loke ta e kompromisonan den grupo C, Kòrsou a gana St. Vincent 5-0, Cuba 2-1 i British Virgin Islands 8-0. Miéntras ku Guatemala a derotá Cuba 1-0, British Virgin Islands 3-0 i St. Vincent & the Grenadines 10-0. Guatemala ta na Kòrsou for di djasabra den oranan lat di atardi i ta hospedando na Dreams, unda ku nan a hiba sekshonnan di práktika djadumingu den stadion di Jong Holland i ayera tardi 6’or den Stadion Ergilio Hato.

Kòrsou ta hospedando den Corendon, despues di a regresá kas djadumingu den oranan trempan di mainta, pa seguidamente a praktiká djadumingu atardi i ayera nochi na SDK. Ámbos ekipo ta kla pa e wega di awe. Guatemala dirigí pa Amarini Villatoro, ta sin 4 piesa klave, manera entre otro nan defensa Gerardo Gordillo, e mediokampista Jose Contreras i tambe ‘Chucho’ Lopez i ‘Nico’ Rittmeyer, kende sigur ta 4 di e piesanan klave di e ekipo, kendenan ta leshoná.

Patrick Kluivert sinembargo ta konta ku tur hungadó ku ta fet i kla pa bai guera awe nochi, ora ku inisiando 8’or di anochi, bala lora den Stadion Ergilio Hato na Brievengat. E ganadó di grupo C, lo topa e ganadó di grupo D, ku ta sea Panamá  (9 punto) òf Repúblika Dominikana (7 punto), ku lo topa awe, djasabra benidero i djamars otro siman.

Login