Back to Top
Vigilante banner image

Efektonan di Covid lo tin konsekuensha severo makro ekonómiko


April 1, 2021 • 3 minüt pa lesa

Foto: Kòrsou mester saka un “foto” pa mira unda e daño ta. Kestion tei bira durante segundo mitar di 2021, ken tei paga pa e kámara.

Punda– E desishon di Gobièrnu di Kòrsou pa Lockdown i bringa Covid, lógikamente ta nifiká ménos benta kolektivo na Kòrsou i ménos entrada pa gobièrnu durante 2021 tambe. Durante 2020, efektonan di Covid i malesa ekonómiko a okashoná ménos negoshi na Kòrsou i konsekuentemente a paga ménos impuesto riba benta (OB) i di ganashi  (WB).

Pa por a akapará parti di e desepshon finansieronan di Covid, Gobièrnu di Kòrsou durante 2020 a risibi asistensha finansiero den forma di “fiansa” serka Hulanda pa kasi 700 mion florin. Pa 2021, mirando e desaroyo di Covid na Oropa i Hulanda, Kòrsou tambe lo sinti efektonan di Covid finansieramente tambe. Covid kombiná ku kontrakshon den ekonomia makro a kousa bahada serio den entrada di impuesto den kaha di gobièrnu. Te ku final di òktober 2020, Gobièrnu di Kòrsou a risibi kasi 400 mion florin ménos na entrada di impuesto. Pa finalnan di desèmber e suma por a yega 500 mion florin ménos na entrada anke presupuesto ta konkluí algu mas abou ku 400 mion ménos.

Prinsipalmente impuesto riba benta (OB) a presta mas di lokual tin riba presupuesto. Pa kada kategoria e retraso ta repartí den: 33 mion pa Impuesto di Salario, 144 mion pa Impuesto riba Benta (OB), 21 mion pa Impuesto di Ganashi, 21 mion pa Impuesto riba Bienes Inmóbil (OZB), 20 mion riba Impuesto di Vehíkulo. Pa lokual ta trata prima sosial, gobièrnu a kobra 24 mion na BVZ i 33 mion na prima  AOV. Kobransa di erfpacht i hür riba tereno tambe a defroudá ku kasi 14 mion florin. Demas retraso pa totalisa e 400 mion florin ta kai den diferente otro kategoria mas cheque di impuesto.

Pero miéntras gobièrnu a risibi ménos sèn na entrada di impuesto, Hulanda a finansiá Kòrsou ku 700 mion na akseso riba e 400 mion di retraso. Si ta solamente a kompensashon den retraso di impuesto, Hulanda a finansiá, lo no ta problema pero kompanianan ku a risibi e NOW tabata obligá na sigui paga impuesto den tur kategoria, kreando asina un márgen di miónes na dòbel entrada pa gobièrnu di Kòrsou ku entretantu a resultá den un surplus pa te ku yüni 2021.

Debí na e finansiamentu di NOW i repago di Impuesto tòg di sektor komersial, pa inisio di 2021, gobièrnu lo ta kreando un “revolving fund”, pasobra kompanianan ku risibi NOW, ta obligá na paga nan kota di impuesto salarial reten’é ku primanan sosial. Gobièrnu den e konstrukshon aki ta duna pero kobra bek, kreando un márgen di fondo ku ta debolbé bek den su kaha. E surplus fiktisio aki sin kontinuo finansiamentu di Hulanda ta krea un problema serio na momento Hulanda stòp e finansiamentunan pa kalke motibu.

Pasobra, meskos ku na inisio di Covid, na 2021, Gobièrnu di Kòrsou mester hasi un rekuento riba posibel efekto di Coronavírus na Kòrsou. E rekuento ta nesesario, mirando ku rònt mundu, e Viro COVID-19, a kousa desaroyonan ekonómiko, tantu den sentido negativo komo positivo. Meskos ku tur parti na mundu, e rekuento ta unu difísil i prinsipalmente na Kòrsou ku ta un isla kompletamente dependiente na importashon sin produkshon nashonal di sufisiente kapasidat. Tur e efektonan di Covid tin riba nos ekonomia mester keda desifrá den finansiamentu. Pero, gobièrnu mester garantisá di no tei krea un posibilidat di dòbel entrada pa sigui finansiá gastunan den sektor públiko so manera tabata e kaso na 2020.

Login