PUNDA- Reguladó ofisial di atministrashon di alimento i medikamentu (FDA) na Estádos Unídos a aprobá uso di e bakuna di Pfizer pa Covid-19 serka mucha di 12 pa 15 aña. Di e manera aki Estádos Unídos ke protehá adolesentenan di su pais promé ku aña eskolar nobo. Tambe esaki ta un stap mas riba e kaminda pa regresá na e bida promé ku pandemia.

Mayoria di e bakunanan aprobá mundial ta outorisá solamente pa adultonan. Sinembargo, e bakuna di Pfizer ta wòrdu utilisá na diferente pais riba personanan di 16 aña bai ariba.

Canada ta e promé pais ku a ekspandé e uso di bakuna na muchanan di 12 aña bai ariba. Suministrashon di e bakuna na e grupo di adolesente na Estádos Unídos ta planiá pa kuminsá asina ku sentro pa maneho di malesanan (CDC) tambe aprobá esaki. Kual probablemente ta tuma lugá fin di e siman aki. Atministrashon di alimento i medikamentu (FDA) a deklará ku e bakuna di Pfizer ta seif i e ta ofresé un protekshon sólido pa adolesentenan mas hóben. E anunsio aki ta basa riba investigashonnan ku a keda hasí serka mas ku 2.000 boluntario  entre 12 i 15 aña na Estado Unídos. Den e investigashonnan hasí no a enkontrá ningun kaso di infekshon ku Covid-19 den adolesentenan ku a keda bakuná kompletamente ku (2) shòt kompará ku un grupo di adolosente ku no a keda bakuná kaminda a enkontrá 18 kaso di infekshon. Ademas, investigadónan a mira ku e grupo di 12 pa 15 aña a desaroyá un nivel mas haltu di antikuerpo kompará ku estudionan hasí anteriormente serka hóben adulto.

E grupo di adolesente investigá a risibí mesun dósis di bakuna ku adultonan ta risibí. Tambe por konkluí ku e efektonan sekundario riba e grupo aki ta similar na esnan konosí serka adultonan kual ta: doló den brasa, keintura, kalafriu i kansa di kurpa, spesialmente despues di e di dos (2) shòt.

Aprobashon di e bakuna na adolesentenan ta momentu desisivo den e kapasidat ku nos tin pa kombatí e pandemia di Covid-19, esaki Dr. Bill Gruber, senior vise presidente di Pfizer a duna di konosé. Hefe di atministrashon di alimento i medikamentu (FDA), Dr. Peter Marks ta añadí ku e investigashonnan hasí pa Pfizer a kumpli ku tur e reglanan rigoroso stipulá. E echo ku tin un bakuna outorisá optenibel pa e poblashon mas hóben ta un stap krítiko pa yuda redusí e preshon grandi riba salú públiko i tur otro sektor, kousá pa e pandemia di Covid-19.

E kompania di Pfizer resientemente a manda pidi outorisashon na Union Oropeo pa aprobá uso di e bakuna serka adolesentenan na Oropa tambe. Kontesta riba esaki ainda no a keda publiká. Aki ta Kòrsou ainda no ta apliká e bakuna di Pfizer na personanan bou di 18 aña. Motibu pa esaki ta ku nos ta sigui e guia stipulá pa RIVM na Hulanda. Pues na momentu ku uso di e bakuna keda aprobá pa personanan bou di 18 aña na Oropa i Hulanda, e ora ei e medida aki lo keda implementá na Kòrsou tambe. Pfizer no ta e úniko empresa di bakuna ku ta investigá uso di su bakuna riba personanan bou di 18 aña. Manera nos a anunsiá algun dia pasá, Moderna a publiká resultadonan preliminario di investigashon di nan bakuna riba hóbennan di 12 pa 17 aña. E resultadonan aki ta similar na esnan di Pfizer, kual ta ta mustra ku e bakuna ta efektivo den e grupo bou di 18 aña i te ainda no a haña ningun efekto sekundario grave.

E siguiente paso den mundu sientífiko ta pa investigá funshon di e bakunanan den muchanan bou di 12 aña. Tantu Pfizer komo Moderna a kuminsá ku investigashon riba e grupo aki kaba. E investigashonnan riba mucha lo eksplorá tambe si muchanan bou di 12 aña, inkluyendo beibi, mester di un dosis diferente kompará na esnan di adolesente i adultonan.  Ekspertonan rònt mundu ta di opinion ku bakunashon di personanan bou di 18 aña ta krusial pa pone un fin na e pandemia di Covid-19. Diferente pais tin difikultat pa yega “herd immunity”, si e bakuna ta aplikabel na tur edat mundu kompletu tin mas chèns pa yega e porsentahe nesesario pa inmunidat kolektivo.