Back to Top
Responsive image
E korant di pueblo

Falta di komprenshon pa e doló real den pueblo, a resulta den mas tenshon i kaos.


June 29, 2020 • 2 minüt pa lesa

Willemstad – Partido Nashonal di Pueblo ta rekonosé e derechi sagrado ku un pueblo tin pa manifestá, pero loke si Partido Nashonal di Pueblo ta kondená fuertemente ta tur e aktonan di destrukshon i susesonan lamentabel ku a tuma lugá na diferente sitio i den nos sentro di siudat.

Sin embargo, nos ta atmití ku Partido Nashonal di Pueblo ta komprondé bon bon, e doló ku pa basta tempu kaba ta reina den pueblo.
Si kurason di gobièrnu realmente tabata bati den pueblo, lo e por a premirá ku e situashon di inseguridat ku poblashon pa largu tempu ta biba den dje, ta krea tenshon, ku por a sali for di man un ora pa otro.

Hopi hende a pèrdè trabou, ta sera skol, bende kompania i propiedatnan di pais, sin tene kuenta ku pueblo. E gobièrnu aktual a sigui tuma desishon na benefisio di un grupito so, miéntras e pueblo mes tin hamber. A neglishá demasiado, e sentimentu i ansha i doló real ku tin den pueblo i awor e situashon a bira un mònster i rementá.

Ta di lamentá ku promé minister tampoko a inspirá ni rèspèt, ni outoridat durante e situashon, ku pueblo lo a ferwagt di un ‘commander in chief’, manera e mes a bisa. E gabinete PAR/MAN/PIN ningun ora so, mester a sinta warda e situashon bin rementá den Fòrti, sino sali demonstrá empatia i atendé i papia ku e pueblo den doló.

For di momentu ku e gobièrnu aktual a sinta, nan no a logra realisá ningun dje promesanan bunita den nan programa di gobernashon. E gobièrnu  mas bien a imponé, na lugá di goberná na interes dje pueblo.
I awe despues di kasi kuater aña, pueblo tin mas hamber i mas doló.
Pa gobièrnu bin televishon i uza palabra bunita kada biaha di nobo, ta mustra ku gobièrnu no ta konsiente di e ansha i intrankilidat ku berdaderamente ta biba den kasnan di famia.

Ora un pueblo pèrdè konfiansa den su gobièrnu pa motibu di manipulashon i p’esei no por duna direkshon, ta un kos masha tristu mes; Pueblo ta sintié  i tin nan dor.

Partido Nashonal di Pueblo ta boga pa pone Kòrsou promé, fria kabes, baha for di riba pedestal, skucha, splika, informá i tuma desishon na benefisio i interes di pueblo di Kòrsou.



Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.