Prepará: Kòrsou a hasi hopi preparashon pa fasilitá e proseso di bakunashon.

PUNDA- Un estudio nobo hasí pa Salubridat Públiko di Inglatera (PHE) a demonstrá ku un dósis di e bakuna pa e vírus di Covid-19 ta redusí transmishon di e vírus den seno familiar ku 50%. E estudio a kompará e chèns di transmishon den kaso di personanan bakuná ku esnan no bakuná.

Estudionan ya a demonstrá ku bakunashon kontra e vírus di corona (COVID-19) ta redusí e riesgo di infekshon i malesa severo signifikantemente. E investigashon nobo ta mustra ku esnan ku a keda infektá ku e vírus despues di a risibí e promé shòt di bakuna tabata tin entre 38% i 49% ménos chèns pa transmití e vírus ku esnan ku nan ta biba kuné ku no ta bakuná. Resultado di e investigashon ta konta pa e bakunanan di Pfizer, kual nos tambe ta usa na Kòrsou i AstraZeneca.

E protekshon ku e promé shòt di bakuna ta duna, a keda opservá alrededor di 14 dia despues ku a risibí e bakuna. E nivel di protekshon ku a keda opservá ta similar den tur grupo ku a keda investigá sin diferensia den edat, kaso òf kontakto ku e personanan tabata tin. Tambe e investigashon a duna di konosé ku bakunashon ta redusí e riesgo di un persona pa haña síntoma di infekshon 4 siman despues di keda bakuná.

Dr. Mary Ramsey, kabes di e departamentu di imunisashon na PHE ta duna di konosé ku bakunashon ta vital den e bataya aki pa bai bèk na un bida normal. Banda ku e bakuna kontra Covid-19 ta redusí malesa severo, hospitalisashon i morto, awor por añadí un benefisio mas kual ta redukshon den transmishon di e vírus na otronan.  E investigashon a inkluí mas ku 57.000 persona di 24.000 kas di famia kaminda sigur tabata tin kaso di persona infektá despues di e promé shòt di bakuna na Inglatera. E grupo di komparashon tabata kasi 1 mion persona infektá ku no a bakuná.

Famianan ku ta biba ku mas ku 2 hende den kas tin riesgo haltu pa keda kontagiá si un persona keda infektá ku e vírus. E famianan aki ta bon grupo pa haña evidensia riba e impakto di e bakuna i prevenshon di transmishon ku esaki ta trese. Sientífikonan ta ferwagt resultadonan similar di e riesgo di transmishon den otro senarionan manera alohamentu kompartí i den prizòn. E resultadonan aki ta mustra ku banda di e informashon ku bakunashon ta salba bida di hende, awor tin prueba tambe ku e bakuna di Covid ta redusí transmishon di e vírus di SARS-Cov-2. Ademas, aun mas ta keda reforsá ku bakunashon ta e mihó manera pa kombatí e pandemia di Covid-19, ya ku e bakuna ta protehá bo mes i tambe ta prevení infekshon na otro si akaso tòg un persona keda infektá despues di bakuná.

Manera ta ku tur investigashon preliminario, ekspertonan internashonal ainda mester revisá e resultadonan aki den un asina yamá “peer review”. Esaki ta un revishon ku ta diseñá pa evaluá balides, kalidat i originalidat di artíkulonan publiká. E revishon aki ta wòrdu hasí dor di otro sientífiko, akadémiko òf profeshonalnan ku ta traha den e mesun área di investigashon. Propósito final di un “peer review” ta pa mantené integridat di siensia dor di filtra i saka artíkulonan inbálido òf di kalidat abou.

E resultadonan aki no ta nifiká ku un shòt di bakuna so ta sufisiente. Ainda ta sumamente importante pa tur hende tuma tur dos shòt di bakuna pa sigurá un efektividat di protekshon mas haltu i optimal. Esaki ta pa kada persona personal pero mas importante pa komunidat di Kòrsou por yega e nivel di protekshon ku nos sientífikonan lokal a stipulá.