Back to Top
Responsive image
E korant di pueblo

Gilmar Pisas: Gobièrnu mester atendé ku su pueblo


June 29, 2020 • 2 minüt pa lesa

Willemstad,– Lider di partido MFK señor Gilmar “Pik” Pisas a bisa ku lamentablemente nos a yega na un página pretu di nos pais kual ta un página ku el a mira ta bini basta tempu.

“Nos di MFK a splika, nos a sklama, nos a roga pa wak e pueblo, a yega dado momento ku e pueblo no por mas”, asina Pisas a duna di konosé. E ta bisa ku a hasi chèrchi di manifestashonnan anterior ku no a konta ku hopi hende. “Nos tabata bisa pa atendé ku e pueblo paso no por sigui asina. Ta lamentabel ku pa falta di no sa di enfrentá (manifestantenan) pueblo komo lider,  ku dado momento no tabata por mas i tabata eksihí un akshon di parti do gobièrnu”, segun Pik Pisas.

E ta bisa ku e ministernan tabata den konseho di minister i e manifestantenan a bai pa bisa gobièrnu ku nan no ke e gobièrnu aki mas i segun señor Pisas, komo lider bo mester a sali i duna nan e otro banda di medaya. Pik ta bisa ku ta hopi kos a pasa pa a yega akinan i el a menshoná algun manera Giro, NOW, Banko Sentral, Inser Air etc.

E lider di MFK ta bisa ku nan a bin ta kanta e kos aki pa hopi tempu i ku niun hende no ta deseá e situashon aki. E ta bisa ku hendenan a sakea Otrobanda i ku esaki ta un akto kondenabel, pero ku mester wak na unda e kos a kuminsá, nan a pidi gobièrnu (Rhuggenaath) pa bini afó, pero no a  duna oido na nan.

Pisas ta bisa tambe ku normalmente Riot ta esun ku ta bini komo último pa kaba kos, pero e den e kaso aki e manifestantenan a sali topa ku Riot Team for di inisio.  “Bèrdat e manifestantenan kier a bai paden, pero despues nan a bin kalma i tabata para pafó ta warda promé minister kende aparentemente lo a sali di patras bai. E lider di partido MFK ta sigui bisa ku for di nada bala ta kai i ta tira gas riba tur hende ku tabata presente, kual a okashoná ku tur hende mester a sali na kareda i tur esakinan djis paso e promé minister no a sali pa papia ku e hendenan. “Si bo a sali lo bo a kalma hinter e pais”, asina Pisas a bisa.

E ta bisa ku awor ku ta bai habri pais pa turista bini, nan ta bai topa ku un sentro di siudat tur destruí.

E ta sigui bisa ku e manifestantenan tabata dispuesto na papia i ku nan kier a drenta pa bisa gobièrnu ku nan ke pa e gobièrnu aki bai kas, kaminda gobièrnu lo por a bisa nan ku gobièrnu no ta di akuerdo ku nan. E ta bisa ku e partidonan di oposishon a pidi pa un reunion públiko di urgensia pa asina atendé e lokual ku ta pasando.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.