Nada: maneho di CMC. Fo’i Aprel niun depchi di gobièrnu.

Punda—Gobièrnu di Kòrsou a keda sin paga CMC un suma di 9.9mion florin ku tabatin riba presupuesto di likides. Curaçao Medical Center, na aprel último a risibi 4.8 mion florin for di gobièrnu, pero despues e “man di finansas públiko a bira geps”.

Un suma di 9.9 mion florin, destiná pa kaha di CMC, nunka mas no a keda depositá. Esaki mester a tuma lugá promé ku finalnan di Yüni. Manera ta konosí, na Yüni último gobièrnu a drenta un situashon di défisit na 10 mion florin. Unu dje gastunan ku no a keda kumpli tabata e pago na CMC.

Durante un rueda di prensa, Maneho di CMC a anunsiá ku na inisio di Aprel e situashon na CMC tabata kaótiko, tantu na nivel operashon komo na nivel finansiero.  E instituto di kuido nashonal, apénas kabes riba awa.  Pero kosnan a bin kambia despues ku gobièrnu di Kòrsou a duna finansiamentu èkstra i gobièrnu di Hulanda a duna asistensha tékniko i di ekipo pa evitá e anunsiá katastrofal pa kuido médiko lokal. Ta trata di e 4.8 mion florin risibi na aprel.

For di inisio di Aprel a duna asistensha di likides unda CMC por a finansiá gastunan marginal envolví ku kuido i kombatimentu di Covid.  Miéntras gobièrnu a duna sèn na inisio di Aprel, Hulanda a sostené ku ekipo tékniko i personal. Miembronan di AMI i Extra Handsen in de Zorg Hulanda a finansiá. Ta trata di gastunan di salario, biahe i estadia. Gastunan di personal di AMI si ta gobièrnu di Kòrsou ta pagando.

Aparte di Covid, konforme veredikto di korte, Gobièrnu mester paga CMC 17 mion florin i SVB a hasi e siguiente proposishon: 6 mion den Yüni, 6 mion den Yüli i 5 mion entre Ougùstùs pa Desèmber. Pero e instituto nashonal di kuido no a risibi ni un depchi ainda fo’i Gobièrnu. E último biaha ku CMC a hole sèn di gobièrnu tabata na Aprel último.