Back to Top
Responsive image
E korant di pueblo

Gobièrnu huntu ku IHS Markit a faya dos biaha ku sosio pa refineria


June 29, 2020 • 3 minüt pa lesa

Chonky de Lannoy, direktor di RdK nunka a splika dikon a bai un di dos trayekto ku IHS Markit. Meskos ku Count, awor ta mustra ku Klesch tambe tei faya.

Ararat— Ta di tres okashon ku aktual gobièrnu di Kòrsou a faya den nan intentonan pa por logra haña un sosio stratégiko pa Refineria Isla/RdK. Aparte di a kibra un akuerdo ku Guangdong Zhenrong Energy, nan no a logra ku ningun dor otro sosio rekomendá pa e kompania IHS Markit

E pregunta importante ta, dikon gobièrnu a opta pa sigui traha ku IHS Markit, sabiendo ku den nan promé intento ya kaba e trayekto di proyekto “Arawak” tabata manchá. E aktual proyekto Arawak, kual proyekto ta deliniá e pasonan pa yega na un sosio stratégiko pa Refineria Isla ta sigui manchá, awor ku Grupo Klesch tambe a bini na duda.  IHS Markit, kompania ku for di aprel 2018 ta duna asistensha na Refineria di Kòrsou, a keda sin hasi e deligensha nesesario na momento el a konsehá Refineria di Kòrsou pa sinta na mesa ku e promé sosio Count Energy. Un rapòrt konfidensial ku RdK a    laga hasi (Ivy Report), ta kuestioná konfiabilidat di funshonarionan ku Count Energy a uza,  Colas Bos i Jeffrey Bollemaker (Colas Bos a haña retiro fo’i Count). IHS tabata e kompania ku a rekomendá Count, durante e promé tanda ku a bai buska un sosio pa RdK.    

Apesar di tur krítika, tòg gobièrnu i maneho di RdK a skohe mesun kompania, IHS Markit, pa guia e proseso pa e Project Management Organization nobo instalá pa RdK. Riba rekomendashon di IHS, a skohe Grupo Klesch. Awor ta resultá ku un biaha mas, IHS a skohe un sosio ku no tin e “strategic fit” pa RdK i niun hende no ta puntra ta dikon Gobièrnu i maneho di RdK tog a sigui skohe pa IHS. Semper a keda un nubia skur riba IHS ku por tin konsekuensha pa e trayekto di Arawak. Count Energy spesífikamente ta unu dje motibunan dikon Ministerio Públiko a laga arestá 4 persona na Kòrsou den kaso Lacerta. I ta netamente IHS a skohe Count komo pa gobièrnu bai sinta na mesa kuné. Riba sugerensha di IHS Markit, refineria di Kòrsou a sinta na mesa ku Count Energy. Count a forma un konsorsio ku e kompania estado unidense, AOT i huntu nan a partisipá na un destaho den e proyekto Arawak pa yuda Kòrsou yega na un sosio stratégiko. Segun e rapòrt konfidensial Ivy, kual rapòrt Ministerio Públiko a uza pa interogá e 4 akusadonan den Lacerta, tabata IHS kende a invitá RdK pa sinta na mes ku Count.

Eugene Rhuggenaath, na tres okashon a faya pa logra un sosio stratégiko pa RdK.
2 biaha ku mesun kompania IHS Markit i un biaha pa laga Guandong Zhenrong kai.
Awe Kòrsou ta sin refineria.

IHS Markit, kende a konsehá RdK pa sinta na mesa ku Count Energy, mester a hasi un investigashon di deligensha riba esnan kende Count ta bai apuntá pa partisipá den e proseso i ehekushon di e destaho. E rapòrt konfidenshal di Ivy ta kuestioná Count i nan representantenan seriamente. Ivy ta konkluí “het gedrag van betrokken medewerkers van Count kan ook niet rechtmatig worden geacht”. Ivy, ta kuestioná legitimidat di aktitut di Colas Bos i Jeffrey Bollemaker, kende tabata CFO di Count na momento tabata negoshando ku RdK. Segun e rapòrt ta konkluí, ku un lus mester a sende serka Bos i Bollemaker, na momento ku e funshonarionan di RdK tabata insistí pa nan dos bai kome i bebe, miéntras tabatin un trayekto ofishal stipulá pa IHS. Ivy ta konkluí ku e dos funshonarionan mester tabata sa mas mihó momento a kuminsá papia riba repartishon di ganashi, mas serio ainda ta lokual e alto funshonario di AOT a deklará despues di a papia ku Colas Bos. Segun e funshonario aki, Colas Bos a bis’é pa paga! IHS, na momento a asumí pa laga Count Energy papia ku RdK, mester a eksihí Count alabes pa pone riba un lista esnan kende lo ta na mes pa ehekutá nan trayekto deliniá pa yega na un sosio stratégiko pa Refineria Isla. N’e momentunan aki, ta IHS mes a sigui den e trayekto Arawak pa yuda RdK yega na un sosio stratégiko ku a bin resulta den Klesch.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.