Back to Top
Responsive image
E korant di pueblo

Gorré por haña preferensha riba Kuwas?


June 7, 2021 • 3 minüt pa lesa

Leo, Kenji ku Juninho ta baha foi konvoi na Guatemala

Brievengat—Direktor Tékniko suplente pa selekshon di Kòrsou, Patrick Kluivert tin un pesadia enorme pa lokual ta trata su promé 11 pilanan riba tereno pa konfrontá Guatemala. E ábil eks internashonal mester pone tur su konosementu na prueba unda tin algun problema di debilidat den nos selekshon. Prinsipalmente den defensa tin “duda” pero Kuwas tambe a bisti unifòrm i indiká sobrepeso.

Ta un hecho ku Guatemala  ta yega Kòrsou sin miedu fo’i un racha di 7 viktoria sin konosé un derota. Su último wega pèrdí ta kontra di Mexico na sèptèmber 2020. E Bi Kolonan di Guate ta mishi suela di Kòrsou despues di 5 wega sin permití gol kontra i 6 wega ganá ku 1 empatá. Pa lokual ta trata region di Karibe e ekipo “Chapin” manera nan ta yam’é tin 15 wega sin konosé derota.

Anke riba “papel” nos tin muchu mas kategoria ku nan,  Kluivert ta e punto mas desisivo. Un desishon malu, por hinka Kòrsou den problema serio. Ta un wega tin, un derota den Ergilio Hato ta kaba ku tur no soñonan pa Mundial. Guatemala no ta un ekipo pa balotá i nan direktor tékniko Amarini Villatoro ta un kos serio. Un tékniko ku no ta kere muchu den hungadónan legionario i ta preferá konsentrá su onsena rondó di esnan kende ta hunga bala den nan kampeonato nashonal. Esnan kende no train bon, simplemente no ta hunga.

Pa tal motibu Kòrsou mester ta skerpi. Djamars lo ta un wega di 90 minüt hungá kasi perfekto. Tin un prekupashon den bolante. Brandley Kuwas durante su último dos bishita na Kòrsou, no a mustra di ta mesun Brandley anterior hungando den Heracles. E yu di Kòrsou, aktualmente hungadó den liga Emirati di futbòl pa Al-Nasr a pèrdè profundidat i kondishon. Ta konosí ku e nivel di futbòl den su region ta hopi mas abou ku esun oropeo i sigur kompará ku Eredivisie na Hulanda. Hasta durante su estadia den segundo divishon ku Volendam, Kuwas tabata mas skerpi. Anke e ta keda un tékniko ainda, pero pa di dos biaha tin indikashon di “fatiga”. Konosedonan di futbòl na Kòrsou, mesora a hasi remarke na momento a nota e sobrepeso di Kuwas.

I kontra di Guatemala e tin karga hungadó riba ala drechi. Na promé lugá, e lateral riba ala robes, Moises Hernandez ta un rutina den kampeonato nashonal i fuerte. No ta pa loko Profe Villatoro a sak’é fo’i wega kontra di St. Vincent pa par’é di leshon. Steven Robles, den bolante interior na man robes ta bira un otro wesu duru pa Kuwas bringa. Tambe ta hungadó rutina i den bon kondishon ku tei duna Kuwas hopi trabou pa keda kreativo. Un di tres doló di kabes por bira Marvin Ceballos, un winger ku tampoko no ta para kere ku pleno konfiansa di Villatoro. Pa Kuwas por sobrebibí e trio “Chapin” djamars awor e mester sosegá i hinka su kurpa mas lihé posibel den kondishon.

Un situashon ferfelu, pero ku Kluivert mester konfrontá i pensa. E punto debil di Kluivert ta ku e no konosé futbòl Concacaf i tin tendensha di balotá. Guatemala ta kos serio. Kisas un opshon pa Kuwas si akaso mester bini kambio ta Kenji Gorre. Anke e por hunga na ámbos banda riba ala medio, su mihó posishon ta unda Kuwas ta hunga. Anke e la start solamente den 44% di su ekipo Nacional na Portugal, e la mustra di ta kore i “stroba” bon riba tereno. Na kreatividat e falta hopi kompará ku Kuwas, pero Kenji ta un bringadó, un fighter ku mentalidat di no entrega. Huntu ku e dos Leo i Juninho riba tereno, Guatemala lo tin mas problema di rekuperashon. Pa Kluivert: tur wowo e siman aki riba Kuwas i bista riba Gore durante training. ( Skibi pa Lilo Sulvaran).



Login