Ilustrashon di antikuerpo atakando e vírus di Covid-19

PUNDA- Segun investigashonnan sientífiko resientemente a prueba ku protekshon dor di sélulanan di nos sistema inmunológiko serka personanan ku a keda infektá pa Covid-19,  ta sobrebibí pa un tempu largu. Inmunidat kontra coronavirus ta dura un mínimo di un aña, posiblemente bida largu, serka esnan ku a keda infektá pa e vírus, spesialmente despues di bakunashon.

Resultado di dos estudio sientífiko, publiká pa e revista di Nature i digital na BioRxiv, ta sugerí ku mayoria persona ku a rekuperá for di Covid-19 i a bakuná despues, lo no mester usa un “booster” den futuro. Sinembargo, personanan bakuná ku nunka a keda infektá pa e vírus probablemente tin mester di un refuerso den futuro.

Ku oumento den bakunashon, ekspertonan médiko ta kere ku e vírus di Covid-19 lo kana mesun trayekto ku por ehèmpel influenza, kual ta rekerí un shòt di bakuna kada aña. Esaki dor ku e vírus ta mutua relativamente lihé i e inmunidat kreá pa e bakuna no ta dura pa semper. Ta importante pa tene na mente ku e ensayonan ku ta tumando lugá ta pa haña mas konosementu i esaki no kemen ku ta sigur ku e terser shòt di bakuna lo keda implementá.

Ámbos estudio a analisá personanan ku ya a keda infektá pa Covid-19 den pasado. E sélulanan di nos sistema inmunológiko ku ta konservá memoria kontrá e vírus di Covid-19 ta keda den e parti meimei di wesunan, pues esaki ta pone ku nan por keda produsí antikuerpo kontra e vírus ora ta nesesario.

E artíkulonan ta konsistente ku literatura ku ta sugerí ku inmunidat provoká pa infekshon i bakunashon ta unu pa bida largu. E resultadonan aki ta kalma e preokupashonnan riba e inmunidat kontra e vírus ku a kambia mundu kompletu. Segun inmunólogo na universidat di Pennsylvania, Dr Scott Hensly, e preokupashon no ta realmente si ta krea inmunidat, pasobra esei ta konosí kaba. E motibu ku ta kuestioná e inmunidat ta pa motibu ku e vírus ta mutua asina tantu i no ta konosí si e inmunidat kreá originalmente ta protehá kontra e variantenan tambe. Ademas, Dr Hensly, ta añadí ku por kompará komportashon di Covid-19 ku por ehèmpel grip kual tambe ta mutua hopi i p’esei tin ta rekerí un shòt nobo kada aña pa protekshon.

Te ainda no tin prueba ku e antikuerponan, kreá despues di infekshon òf despues di bakuna, ta inefektivo kontra variantenan. Al kontrario, e sélulanan di memoria, yamá “B cells”, ta asina potente kontra e vírus di SARS-CoV-2 ku asta nan ta protehá kontra e variantenan aktual. E resultadonan di inmunidat pa bida largu no ta meskos pa e inmunidat kreá pa bakunashon so. E memoria inmunológiko desaroyá pa un bakuna ta organisá di un manerá diferente kompará ku despues di infekshon ku e vírus. Esaki ta nifiká ku personanan ku no a kontagiá Covid-19 nunka pero a bakuná si, posiblemente lo mester di usa shòtnan di refuerso despues, meskos ku ta e kaso serka diferente otro bakuna. Investigashon riba e “booster” shòtnan ta kanando pa averiguá si esaki lo ta algu nesesario sigur òf no.

Ekspertonan ta di akuerdo ku probablemente e inmunidat desaroyá natural dor di infekshon lo ta diferente for di inmunidat kreá pa un bakuna serka personanan ku nunka no a haña Covid-19. Kombatí un vírus bibu ta otro kompará ku antikuerpo kreá a base di proteinanan paresido na e vírus.

E resultadonan aki no ta nifiká ku e bakuna no ta funshoná. Al kontrario, e bakuna ta prevení tur riesgo negativo ku e infekshon ku Covid-19 ta trese kuné manera síntomanan ku ta prolongá, hospitalisashon i morto. Mundialmente coronavirus a kousa aproksimadamente 3.7 mion morto, ekspertonan médiko ta spera ku awor ku e trayekto di bakunashon a keda implementá mundialmente personanan lo hasi uso di esaki tambe pa protehá nan mes i nan próhimo.