Back to Top
Responsive image
E korant di pueblo

Kabesante di grupo ku a sekuestrá i dera komersiante bibu detené


June 30, 2020 • 2 minüt pa lesa

Willemstad— Ayera den oranan trempan di mainta e tim di aresto a logra di detené un hòmber kual ta sospecha di tabata esun ku a orkestra e plan pa asina por a sekuestrá i asesiná e komersiante Venezolano.

Ta trata di e kaso  unda  e víktima venezolano Angel Alexander Barrios Rodriquez, nasé na Venezuela di 51 aña di edat kende tabata pèrdí for di djabièrnè 7 di febrüari 2020, a wòrdu derá bibu  riba un tereno di plantashon na Choloma. 

Pa e kaso aki primariamente  a logra di detené un sospechoso  di 20 aña  ku  a deklará huntu ku ken mas e akto horibel aki a wòrdu kometé ya ku a dera e komersiante aki bibu ku su mannan mara den e buraku riba e tereno na Choloma.  Ta trata di netamente un trahadó di e komersiante víktima ku tabata envolví den e kaso horendo aki. E sospechoso mester a deklará tantu serka Polis i tambe den Korte ken mas a partisipá den e kaso di sekuestro aki ku a bai kulminá den asesinato i tambe esun ku tabata na kabes di e grupo ku a bini ku e plan. 

Pa sostené su mes deklarashon  dia 18 di mart último den oranan di mèrdia  e tim   reshèrshi ku ta kondusiendo e investigashon huntu ku e sospechoso mes i tambe e tim Forensiko a bai riba un tereno unda ta planta na Choloma pa asina buska e kurpa sin bida. Tabata riba indikashon di e sospechoso mes ku a bin haña sa unda e kurpa sin bida tabata dera. Mester a hasi uso di un katerpilar pa por a koba i yega na e kurpa dera. A tuma nota ku e mannan di e víktima tabata mara i despues ku a bai hasi mas investigashon a bin identifiká e kurpa sin bida komo e komersiante Barrios ku tabata pèrdí.    Investigashon den e kaso aki a kontinuá i   djaluna 15 yüni 2020, alrededor di 04.30’or di mainta, personal di Divishon di Krímen Organisá den koperashon ku KMAR a tene entrada hudisial na  diferente adrès unda a detené un grupo di latino sospecha di tambe ta envolví den e kaso horendo aki.  Mesora a sigui ku e parti di investigashon i tambe interogashon unda a bin haña sa ken ta e posibel kabesante di e grupo aki ku a ordená pa kometé e kaso di sekuestro. 

Esaki a pone ku djaluna 29 yüni 2020, alrededor di 5’or di mardugá, personal di Divishon di Krímen Organisá a tene entrada hudisial den un kas na Biesheuvel.  E entrada hudisial ta den kuadro di un investigashon penal ku ta andando relashoná ku un kaso di sekuestro i asesinato di e komersiante  Barrios ku a ser dera bibu riba e tereno na Choloma.  En konekshon ku esaki a detené na e adrès ariba menshoná, e hòmber G.D.O.O. nasé na Venezuela di 28 aña di edat.  Durante investigashon polis a haña i konfiská algun telefòn.

A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.