Back to Top
Responsive image
E korant di pueblo

Kantidat di pashènt den ICU ta sigui haltu pa habri bèk


May 4, 2021 • 1 minüt pa lesa

Izzy Gerstenbluth.

Punda—Epidemiologo, dr. Izzy Gerstenbluth ayera durante rueda di prensa a duna di konosé ku e kantidat di pashènt den Kuido Intensivo ainda ta haltu i mester sigui vigilá e situashon. Esaki ta unu dje faktornan dikon ainda no por habri Kòrsou kompletamente.

Anke e registrashon diario na CMC pa drenta Kuido Intensivo último siman no a subi, e kantidat a sigui te ku ayera atardi na 24. Esaki ainda ta haltu. Segun Gerstenbluth e problema ta ku un pashènt di Covid ta tuma largu pa rekuperá. Anke e kantidat di pashènt hospitalisá te ku 30 aprel tabata 37, segun direktor di CMC Gilbert Martina, e kantidat di 24 den ICU ta unu preokupante. Na CMC e periodo promedio pa un pashènt ku Covid drumi den Kuido Intensivo ta entre 3 pa 4 siman.

For di 24 di aprel e kantidat di pashènt den Kuido Intensivo no a oumento miéntras pa un siman no tabatin mas pashènt nobo ku a drenta. Pero esaki no ta motibu pa habri kompletamente Gerstenbluth a duna di konosé ayera. Te ku ayera, 64% di e pashèntnan den CMC ku Covid tabata kedando den Kuido Intensivo, esaki ta e % haltu ainda. E desaroyo for di inisio a sigui preokupante. Riba 1 di aprel 28%, di pashèntnan di Covid na CMC tabata den Kuido Intensivo. Riba 10 aprel tabata 29% i riba 30 di aprel último esaki a yega 64%.

Gerstenbluth for di algun siman ta splika ku e kantidat di pashènt den kuido intensivo (ICU) ta e indikator mas importante pa determiná nivel di medida pa  kontrolá desaroyo di Covid. Esaki e la bolbe enfatisá ayera.

Login