Back to Top
Responsive image
E korant di pueblo

Abogado Loth akusá pa trafikashon di hende


June 15, 2021 • 2 minüt pa lesa

 

Nieuwe Haven— Abogado Loth huntu ku su defensa den persona di abogado mr. Martis a hasi petishon na korte pa por skucha 75 testigu den e kaso Campo Alegre. Abogado Loth ke hasi esaki paso segun e ku e muhé nan a traha plan pa deklará kontra di dje.

Korte a trata kaso kontra di Loth pero esaki tabata pro forma, unda ku tin algun akusashon den kontra di dje. Ta akus’é ku den e periodo di Aprel 2018 pa 2 di Yüni di aña 2020 komo direktor di RectourCorporation a keda deklara komo bankarota. Den e periodo di 13 mart te ku 10 di Aprel di aña 2020 lo a hasi destrukshon, den e mesun periodo lo a hasi trafikashon di 5 persona. John Loth, direktor i akshonista mayoritario den Rectour Corporation di kual ta e kompania ku ta manehá Campo Alegre ta den un lucha tenas kontra Ministerio Públiko. Aparte di un eks propietario ku ta kleim 25 mion dòler riba Campo, hustisia di Kòrsou tei buska e kompleho. Ministerio Públiko tin un kleim original di 14 mion florin riba e bòrdel na Hato. No ta konosí kuantu Rectour a paga bek entretantu, pero tabata menshoná suma di 50 mil florin mensual. Esaki tabata sifranan menshoná den medionan di komunikashon.

Na vários okashon tabatin personanan ku tabata bai hiba pakete pa e damanan pa asina nan por tin di kome pero Loth tabata destruí esaki nan, pero e mes no tabata sòru pa nan por a haña di kome. Aparte di esaki Campo tabata sera i e dama nan no tabatin manera di paga e hür di nan kamber, pero Loth a splika nan ku nan mester hasi esaki di un manera òf otro si no e lo kita esaki asina Campo habri bèk. Segun e dama nan Loth tabata hasi hopi kos ku no ta kuadra, i tantu e dama nan i e trahadónan a disidí di denunsia. Durante tratamentu di e kaso e defensa di Loth a indiká ku nan lo ke skucha 75 testigu di kual ta enserá Cornelis di MEO, algun dama, dòkter Maduro, e persona ku tabata duna e dama nan antikonseptivo, algun bewaker etc.

Pa loke ta trata e akusado mes e la ninga tur e akusashonnan ku tin den su kontra, i e la splika ku niun di e kosnan ku e dama nan òf empleadonan ta bisa no ta kuadra. Fiskal mr. Niks a bai di akuerdo pa skucha solamente 8 testigu pa e kaso aki. Wes lo tuma un desishon den e siman binidero.

Login