Na finalnan di yanüari 2020, PAR a pone un rueda di prensa pa anunsiá retiro di Alcala Walle.

Konforme Lei di Screening bo no por ehersé 2 funshon na momentu ku bo ta mandatario. Ta hustamente e parti aki di lei di screening a hasi ku  Steven Martina mester a baha komo minister di ekonomia. Marylin Alcala Walle a kometé mesun fayo i tambe riba 27 di yanüari 2020 a tuma su retiro.

E lei di screening ta mustra riba e echo ku bo tin di distansia bo mes di sea bo negoshi òf fundashon na momentu ku ta atendé bo proseso pa bira minister. Pa lokual ta trata Marilyn Alcala Walle, e no a distansia su mes for di su fundashon ku ta karga su nòmber. Na momentu ku Vigilante a tuma nota di esaki na 2019, nos a subi e sistema di Kámara di Komersio i por a komprobá ku enbèrdat e fundashon di Marilyn Alcala Walle ta ainda na su nòmber. Di akuerdo ku e registro di Kámara di Komersio e ta presidente dje fundashon ku ta karga su nòmber. Ta resultá ku e fundashon aki tin un página na nan nòmber. Vigilante por a tuma nota ku trabes dje página aki tambe Marilyn Alcala Walle a ekstendé invitashon na eks studiantenan di DUO den un reunion ku a tuma lugá ku sala yen. Riba su mes página el a invitá e studiantenan dje forma aki:  Minister ta invitá tur ex-studiante ku tin reto pa paga DUO-studiefinanciering pa un reunion. Vigilante tabata e promé medio pa apuntá esaki.

Esei tabata e invitashon ku Marilyn Alcala Walle a ekstendé atraves di su página riba Facebook. Segun Sra Marilyn Alcala Walle su funshonnan boluntario efektuá pa Fundashon Marilyn Alcala Walle no a sigui, pero manera menshoná mas ariba ta asina esaki a eksistí bou di su nòmber na Kámara di Komersio. Pa kolmo parti dje trabounan hasi pa Fundashon Marilyn Alcala Walle tabata hustamente e asuntu di eks studiantenan ku ta pega ku e debenan di DUO. El a hasi e invitashon na e eks studiantenan atraves dje página di e Fundashon Marilyn Alcala Walle.  Ounke el a bisa di a stòp ku e trabounan boluntario pa e fundashon aki  el a sabi na ekstendé invitashon na e eks studiantenan. E invitashon a ser ekstendé na e eks studiantenan atraves di su página personal komo dje fundashon ku ta karga su nòmber i kua tin su ruman komo sekretario i tesorero dje fundashon konforme e registro di Kámara di Komersio. Na momentu ku redakshon di Vigilante a tuma nota di esaki for di 26 di ougùstùs a trata na drenta den kontakto ku Marilyn Alcala Walle, pero e esfuersonan tabata enbano.

Despues dje publikashon di Vigilante Alcala Walle  a trata na trese kambio na su fabor dor di hasi sierto maniobranan den e registrashonnan na Kámara di Komersio. Ta resultá despues ku partido MFK a laga hasi un investigashon kua a duna komo resultado ku nan a konstatá ku e mandatario a kometé un echo kastigabel. Den e kaso aki el a hasi su mes kulpabel na “anti datering” kua ta “valsheid in geschrifte”.  

Na finalnan di yanüari, riba 27 di yanüari 2020, Partido PAR a yama un rueda di prensa urgente atardi na nan sede, kaminda nan a anunsiá ku minister Alcala Walle a disidí ku e ta entregá su retiru despues ku den oranan di mainta ministerio públiko a yama promé minister Eugene Rhuggenaath pa pone na altura ku tin un investigashon ta bai kuminsá despues ku na òktober 2019  a drenta un denunsia kontra di Minister Marilyn Alcala Walle. E denunsiá aki ta pa posibel violashon di e Landsverordering Integriteit Kandidaat Ministers, kual tambe ta konosí den bola di pueblo komo lei di screening. Despues ku e keho a drenta den luna di òktober, mesora den e mesun luna aki ministerio públiko a duna òrdu na landsrecherche pa hasi investigashon di e echo, basá riba e denunsia aki. Entretantu a investigashon a terminá ku e investigashon aki i kual a kondusí na un investigashon penal ku lo inisiá kontra señora Alcala Walle.•