Back to Top
Responsive image
E korant di pueblo

Konosido eks deportista i aktor Shad Gaspard a hoga na Estados Unidos


May 22, 2020 • 3 minüt pa lesa

Oriundo di nos isla kende ta primu di kantante ‘Tsean’

MERKA—E konosido eks deportista i aktor Shad Gaspard a fayesé trágikamente na Merka. Ta trata aki di un konosido personahe, oriundo di nos isla, kende a destaká den deporte, tabata ehersé trabounan komo seguridat personal pa entre otro e deportista bòksdó Mike Tyson i tambe di e kantante, aktris i bailarina Britney Spears, miéntras ku e mes tambe tabata aktor. Shad tabata un gran luchadó i aktivo den WWE (World Wrestling Entertainment).

Shad kende tabatin 39 aña di bida, a bin di mayornan Ben Gaspard di Haiti i su mama ta Ingrid Chittick, oriundo di nos isla. Tambe e ta primu di e konosido kantante i artista Quinthony ‘Tsean’ Thomasa, unda nan mamanan ta ruman. Deporte Vigilante tabata den kontakto ku e kantante, kende ta basta kibrá, pa ku e pèrdida di su primu/ruman stimá.

Shad tabata kasá i tabatin un yu hòmber di 11 aña di edat, yamá Aryeh, na kende e tabata dediká mas tempu di su bida, unda ku su famia semper tabata na promé lugá pa su persona. Tabata djadumingu último ku e la bai landa ku su yu na momentu ku tabata e promé fin di siman ku a habri e posibilidat aki na Los Angeles.

Dado momentu mester a bati alarma pa yudansa na momentu ku un hòmber i un mucha ku a resultá di ta Shad i Aryeh, tabata den problema den laman, algu promé ku 4’or di atardi.

Na momentu ku a inisiá ku e parti di reskate, e tata i su yu tabata na mas o ménos 50 meter for di Venice Beach, den un koriente fuerte, kual e kabesante di e departamentu di bomberonan ku tabata enkargá ku e trabounan di reskate, Kenichi Haskett, a splika di e siguiente manera:

“E mihó manera pa deskribí e situashon, tabata ku bo ta sinti manera ku bo ta den un wasmashin. E olanan grandi i koriente fuerte tabata gòlpiá i pushá nan abou, pa seguidamente tuma nota ku nan tabata sigur mas ku 150 meter mas leu, di unda a señalá nan den promé instante.
Di tur manera a trata na yuda nan pero e físika di e tata i e kondishon di awa a pone ku kosnan no a bai fásil. Entre otro e tata mes a grita i a pidi pa bai ku su yu i skapa esaki p’e unda den algun minüt esaki tabata sano i salvo na kosta físikamente ileso pero profundamente angustiá. Na momentu ku a kaba di pone e menor kantu i a bira bèk pa wak e tata a mira kon un ola a push’é bou awa. Inkluso ku yudansa di vários sambuyadó no a logra topa kuné mas i tabata te djarason último den oranan di mainta 3 dia despues ku a topa su kurpa sin bida ta drif”.

Sigur un suseso tristu, unda te na último por a prueba ku en bèrdat e tabata stima famia i su yu pidiendo pa salba su yu. El a krese na Brooklyn unda su tata a kombertié den luchadó for di mucha supervisando su training di bòkseo,kickboxing i muay thai. Na momentu ku Shad tabatin 16 aña di edat, ya e por a gòlpia algun hòmber. Na aña 2005 ku 24 aña di edat el a firma ku WWE unda e tabata parti di e ekipo ‘Cryme Tyme’. Tambe e tabata un aktor i a skibi un dokumentario yamá ‘Pinfall’ i tabatin aparishon den algun konsierto, kual tabata e diferente motibunan, ku e notisia aki, a hala basta atenshon.

Deporte Vigilante ta manda palabranan di kondolensia na famia i konosínan.

Shad Gaspard i su junior Aryeh, unda por mira parti di e banderanan di Kòrsou i Haiti den fondo.
Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.