Back to Top
Responsive image
E korant di pueblo

“E sistema di Kluivert NO ta funshoná !”


June 10, 2021 • 4 minüt pa lesa

Tékniko Patrick Kluivert huntu Bertus Holkema: falta konosementu di selekshonadonan

WILLEMSTAD—Eldon ‘Peppie’ Sulvaran un biaha mas na palabra awe, pa asina kompartí su pensamentu, sintimentu i opinion, riba nos ekipo nashonal di futbòl. Esaki despues di e wega di djamars último, ora nos a empatá sin gol kontra Guatemala.

Pabien pa Kòrsou

“Un pabien grandi na Kòrsou pa a yega e di dos buèlta di klasifikashon pa mundial. Hubilo si no mester tin ainda, paso ainda nos no a yega e oktagonal, ku ta e buèlta final di CONCACAF. Motibu pa preokupashon si tin.

Grupo C

Nos tabata gran faborito pa gana grupo C. Danki na un gol di Kenji Gorré na último momentu kontra Islanan Birgen Ingles i apesar di e sistema nobo implementá pa Kluivert, nos  a klasifiká di chiripa kontra paisnan ku ta 50, 100 i hasta 150 lugá mas abou ku nos riba ranking di FIFA. Esei ta un realidat.

Sistema 4-2-3-1

Nos tin mas ku kuater aña ta kosecha éksito ku un sistema perfekshoná di 4-2-3-1. Un sistema skirbí riba nos kurpa. Awor ku Anita i Felida, tin aun mas motibu pa sigui perfekshon’é. Kluivert a yega i sin ningun motibu opvio a bòltu e sistema pa un ku aparentemente e so ta komprondé te ainda.

Vurnon Antita, piesa klave den selekshon i amplio eksperensha

Imposibel

Na promé lugá ta imposibel pa un entrenadó yega den un grupo nobo ku e tin solamente un par di dia i ‘sleip’ un sistema nobo i kompletamente diferente den e grupo. Na di dos lugá, no tin niun motibu pa kambia un sistema ku a trese tantu éksito pa nos orguyo nashonal. Paso esei e selekshon aki ta, nos orguyo nashonal. E sistema di Kluivert no ta funshonando. E úniko kos kla, ta ku e ta hunga ku 3 defensa ku por sierto kontra Guatemala a alkansá un bon nivel. Kevin Felida a demostrá den e minütnan ku e la hunga ki klase di hungadó e ta, kibrando wega di e kontrinkante, ganando duelo i hasi bon pase.

Kevin ku Brandley: dos bolante diferente. E balans perfekto

Sistema Kluivert

E sistema no muchu kla di Kluivert no a funshoná ni kontra Islanan Birgen ku tin un ekipo ku mas ku mitar ta studiante. Nos a hinka gol promé mitar, paso tabatin hungadó di hopi nivel riba tereno. Ora a saka e piesanan klave, den di dos mitar te hasta kontra un ekipo asina nos no a imponé. Danki na e gol di Kenji ku awe nos no ta yora malai. Kontra Guatemala e wega no a sali ‘at all’.

Kenji Gorre, mei mei, su gol kontra di Islanan (Virgen) Britaniko a resulta di ta e motibu dikon nos a yega mas leu

Defensanan a hunga bon

Mester bisa si ku ‘Cuco’, Gaari i Suently a hunga bon. Suently a sorprendé teniendo na kuenta ku e tin hopi tempu sin ekipo. E tabata un di e mihónan riba tereno. Rèspèt ruman, di nos tur ku a duda den bo.

Juniho Bacuna

Juninho ta wòrdu uzá kompletamente robes. E no ta un sorto di ‘linksbuiten’, pero na Inglatera e ta un ‘central midfielder’, esta un bolante sentral. Ei ta su forsa. E no por kore e linea riba banda robes manera e ta ekselá mei mei di tereno. Un simpel bista riba Internèt ta siña nos na kua posishon Juninho a traha nòmber, ku ta bolante sentral. Paso e ta tira ku tur dos pia, por saka hungadó i pasa bala i ta traha duru. Den e sistema di Kluivert e ta pèrdí i nos ta pèrdè su kualidadesnan.

Generashon Bacuna: Juninho ta karga su sobrino despues di wega. E generashon Bacuna i tradishon di Boca Sami ta un kultura importante den selekshon

Kalidat individual

Nos a saka empate riba kalidat individual i trabou duru kontra un ekipo rankiá 50 lugá mas abou ku nos, pero ku a hunga ku entrega i tabata bon akoplá i organisá, lokual nos no tabata.

Kambio Ayrton Statie

E kambio di Statie tambe ta inkomprendibel. Statie no tin ekipo, no a hunga nunka riba e nivel máksimo i tin shete luna sin hunga futbòl organisá. Esaki tambe ta prueba ku e kuerpo tékniko no konosé e hungadónan. Kaminda Statie a drenta ta posishon ku Kenji Gorre sa hunga. Un hòmber ku ta hunga den e liga máksimo na Portugal, Primeira Liga pa Nacional. Un hungadó konosí pa kore hopi i yuda defensivamente. Kosnan asina no mag sosodé si nos ta pretendé di ke yega mundial. 

Próksimo wega

Kontra ‘La Marea Roja’  ku ta otro nòmber di kariño di Panamá, ta otro historia. Esaki ta un pais mundialista ku otro for di Guatemala ta bin ku hungadó di mes nivel ku nos, ku tambe ta hunga den ekstranheria kombiná ku hungadónan di nan liga profeshonal. Panamá ta rankiá na mes un nivel ku nos i ku ta konta den CONCACAF.

Robles di Guatemala a sera Antonia hinter anochi i hasi e kosnan difisil pa nos

Adaptá nos sistema

Si nos no adaptá nos sistema i sigui riba e rumbo fatal aki, nos chèns pa kai afó ta grandi. Sigur den e promé wega for kas nos mester ta defensivamente sólido. E mihó opshon ta pa bai bèk na e sistema ku e hungadónan konosé i ku ya nan tin e patronchi. Mester trese Darryl Lachman bèk òf hala Leandro den sentral i pone Kevin banda di Anita dilanti e defensa, paso nan dos ta dos  ‘kita bala’ di e mihó marka.

Resultado kontra Panamá

Saka un bon resultado na Panamá pa bin kaba kos na kas mester ta nos meta. Si nos ke tin chèns pa yega oktagonal, e vehíkulo mester ta esun ku semper nos a konfia riba dje, 4-2-3-1. Ku un vehíkulo ròkòtòkò nos por trompeká den porta di oktagonal.
BAN PA BAI ‘PANTERA NEGRA’”, Eldon ‘Peppie’ Sulvaran a duna di konosé ayera.

Login