Back to Top
Responsive image
E korant di pueblo

Kòrsou no ke entrega 12.5% ni 20%: Akuerdo di Kresementu ta kai


June 29, 2020 • 2 minüt pa lesa

Raymond Knops

Punda—Ta opvio ku Kòrsou no ke entrega nada na salario. Esaki ta lokual ta saliendo dilanti durante e siman tras di lomba. Ku e desishon aki, e relashon entre Hulanda i Kòrsou pa lokual ta trata sosten finansiero, ta bai kai den un debakel. Awe Sekretario di Estado pa Relashonnan den Reino, Raymond Knops a manda bisa parlamento di Hulanda ku e Akuerdo di Kresementu firmá ku Kòrsou a kai.

E notisia no ta unu muchu alentador pa demokrasia di Kòrsou i ta lanta spekulashon ku entrante otro siman djabièrnè Raymond Knops ta bai menshoná su plan nobo pa Kòrsou. Ya kaba Knops a splika e lokual nan tei menshoná na Hunta di Minister di Reino, lo ta riba mesun liña ku e Akuerdo di Kresementu. Pero e akuerdo ku Minister Eugene Rhuggenaath a firma ku Raymond Knops na yüli 2019, ta tene portanan habrí pa Ulanda por sigui eksihí di Kòrsou pa bende e.o. su propiedatnan. Esaki den forma di aktivonan riba balansa di kompanianan anónimo pero tambe simplemente tereno riba e isla, esta e asina yama “grondontwikkeling”. Segun Knops su akuerdo, Ulanda ta demandá pa Kòrsou presentá un plan di desaroyo di su terenonan. E plan aki mester keda someté na evaluashon tantu pa Cft, e komishon supervisádo di finansas públiko pero tambe pa e servisio di finansas lokal, dirigí pa funshonarionan ulandes for di Den Haag. No tin ningun duda ku Ulanda ta bini Kòrsou pa “total control”. 

Esaki lo sosodé atraves di e medidanan fiskal imponé riba e pueblo di Kòrsou.. Knops ke mira ehekushon di kòntròl riba e medidanan. Knops a firma e akuerdo individual ku Kòrsou, esta pafó di e struktura di Leinan di Konsenso i restrukturashon estatal. E akuerdo tin un kantidat di 15 artíkulo. Knops i Cft semper a enfatisá riba lokual nan a definí komo, “inkomstverhogende maatregelen”, esta medida pa oumentá entrada di gobièrnu. Esaki ta nifiká dirèkt, pago di mas impuesto kombina ku entrega den sektor públiko.  Raymond  Gradus, presidente di e Komishon pa Supervishon Finansiero, Cft, den su karta na Raymond Knops a urgi pa na Kòrsou empleadonan tambe kontribuí ku 20% i amtenarnan ku 12.5% . For di aprel Gradus i Cft a splika Kenneth Gijsbertha pa kòrta den e suma i laga empleadonan tambe kontribuí. Asina Kòrsou tin di pidi ménos na fiansa. Tabata den luna di aprel ku ainda e konstrukshon tabata 80% lo wòrdu finansiá via di Fondo di Sosten i 20% dor di doño di trabou. Gradus ta haña ku esei ta parti di e solushon i Cft a konsehá pa kòrta den ora di trabou, werktijdverkorting. Gradus i Cft ke mira Kòrsou pidi ménos pa supsidio na salario. Esaki ta nifiká ku na Kòrsou sea fo’i su saku links of règts, e empleado mester entrega. Kòrsou entretantu ta manda mensahe kla ku nan no ke entrega.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.