Back to Top
Responsive image
E korant di pueblo

Kumpra bo “Big Mac” i aportá


November 21, 2020 • 3 minüt pa lesa

Saliña— Awe djasabra 21 di Novèmber ta e gran dia di e kampaña “Great Day”2020. Esaki ta un kampaña lansá pa McDonald’s Kòrsou, tur fondo rekoudá dor di benta di e famoso ”Big Mac” lo wòrdu duná na Funditut i Ronald McDonald House Charities Curaçao.

E evento aki ta reforsá́ e kompromiso di McDonald’s pa logra un impakto positivo den e komunidat lokal, dor di sostené́ inisiativanan ku ta duna mihó oportunidat na hóbennan pa ku nan futuro i yuda famianan keda huntu na momentu ku mas mester. Vigilante a hiba kombersashon ku sra. Claudia Rigaud ku ta representante di Ronald McDonald Fonds, i e persona a konta un tiki di e fundashon aki. Ronald McDonald ta un fundashon ku a bin ta traha 9 aña den St. Elisabeth Hospital promé i awor nan a pasa pa Curaçao Medical Center. Kaminda nan ta ofresé espasio, servisio i sosten na mayornan pa ta serka di nan yu na momentu ku e yu ta malu. Nan meta ta pa kita e miedu i/òf strès ku e mama nan ta haña na momentu ku nan yu ta den hospital. Nan ta hopi kontentu i agradesido ku Mc Donald’s ku a hasi e kampaña aki pa yuda nan.

Representante di Fundashon Funditut

Nos a hiba palabra tambe ku un representante di Fundashon Funditut kual ta sra. Ermaline Weever. I el a splika ku hóbennan di entre 16 pa 25 aña ta sigui un trayekto di karpinteria òf konstrukshon serka Fundashon Funditut. Nan ta traha tur kos ku ta di palu. Tur sèn ku nan rekoudá for di e kampana aki ta pa e fundashon, ya pa asina nan por kumpra mas material pa e hóbennan aki por haña.  I si tin un persona ku tin un idea pa laga traha algu di palu  tambe por pasa serka nan i e hóbennan lo por hasi esaki. Nan tin diferente obra traha kla kaba pa bende. Nan ofisina ta situá na Groot Kwartier, na kaya Wladimir Coco Balentien 41 A.

Representante di Ronald McDonald Charities

E “Great Day” lo ta un dia kaminda tur e restorantnan di McDonald’s Kòrsou lo risibí bishita di nan embahadora kual ta Germone De Lima. Pa e ta algu great di por ta e embahadora di e kampana aki. E ta un persona ku a haña hopi apoyo di komunidat den e trabou ku e ta hasi, i e ta p’esei e ta pensa ku ta hopi importante pa duna bèk na komunidat. I ku no ta solamente tuma den e pais ku bo ta biba aden pero tambe den un forma duna bèk. “Meskos ku ami a haña oportunidat den bida, mi ta kere ku di un forma mi tambe lo por aportá pa otro nan tambe haña e chèns aki”. I e ta spera ku Pueblo di Kòrsou tambe duna di nan banda pa asina por aportá na eksistensia di e 2 Fundashon nan aki. Esaki ta lokual ku Germone embahadora a duna di konosé.

Kada Fundashon a haña “voucher” pa bende. E meta pa ku esaki ta ku e Naf. 7,90 ta bai pa e fundashon. Kada kliente ku kumpra un voucher por redeem esaki na un di e filial nan di McDonald’s. E voucher ta bálido di 21 di Novèmber te ku dia 30 di Novèmber 2020. Tur persona ku ta interesá di kumpra voucher por tuma kontakto ku Funditut na 525-9102 ò f RMHC Curaçao na 510-2999. Ban yuda e bon kousa aki i kumpra bo Big Mac pa únikamente Naf 7.90!

Login