Back to Top
Responsive image
E korant di pueblo

Latinonan sospechá di a tira tira riba polis ta basha abou riba otro


June 29, 2020 • 2 minüt pa lesa

WILLEMSTAD,—- 3 latino tabata den korte pa un kaso unda nan lo mester a bai tira atrako riba un kantor di number den bario di Dein 1 òktober aña pasá, unda despues ku polis a logra señalá nan riba Helmin Wiels Blvd, nan lo a kuminsá lòs tiru riba e polis ku tabata kore nan tras. E hòmbernan di fam Ruiz, Escalona i Perez tabata den korte pa e kaso, kual por a nota ku Perez ta para ariba ku e no tin nada di aber ku e atrako i no tabata ni sa ku tin plan pa tira un atrako, pero di otro banda Ruiz i tambe un testigu ta para ariba ku e ta esun ku a bula tras di bali pa bai ku e plaka nan.

Tabata 1 di òktober 2019 ku polisnan a haña un yamada ku un kaso di atrako a kaba di tuma lugá na Gilsha Lottery den Dein kual mesora a inisiá ku un búskeda den diferente kaya ku e atrakadó nan por a uza pa nan por hui for di e sitio. Tabata riba Helmin Wiels Blvd ku a bin señalá e vehíkulo ku nan lo tabata move aden, esta e vehíkulo ku e víktima a indiká ku nan tabata move aden, kual mesora polis a duna nan òrdu pa para.

 Por a nota ku e shofùr di e vehíkulo no a duna oido, kual a sigui kore bai. Durante e intento di huida, a bin nota kon un di e latino nan ta saka kabes for di bentana pa tira riba polis. E kaso sigur ta unu ku a hala atenshon mirando ku ta persiguí e latino nan pa atrako, poseshon arma kandela i tambe intento asesinato kontra e polis di fam Lacroes. Tabata mas despues durante e persekushon ku a bin logra realisá detenshon di e sospechosonan, despues ku lo mester a hasi uzo di man duru pa por detené nan, pasó nan no kier a sigui òrdu.

Loke sigur a hala atenshon den e kaso, ta e deklarashonnan ku ta kontradesí otro entre e sospechosonan. E sospechosonan Escalona i Perez ta desmentí di sa algu di e kaso di atrako, kual nan ta bisa ku esaki nunka tabata den plan i ku na niun momentu nan no a mira Ruiz ku un arma i tampoko a mir’é baha ku esaki for di outo. Perez a indiká ku el a drenta e negoshi pa por kumpra number, pero despues Ruiz a drenta ku arma pa atraká e víktima den e negoshi.

Despues ku Perez a ninga Ruiz mes a yuda polis solushoná e kaso, sosteniendo deklarashon di e víktima. Ruiz a indiká ku Perez ta esun ku a bula tras di bali i bai ku e tas di plaka, kual ta netamente loke e víktima tambe a deklará. Ruiz ta e úniko ku a atmití kual el a bisa ku ta pa motibu ku e no tabata haña trabou el a disidí di hinka su mes den e problema aki. Mas aleu el a bisa ku ya el a yega di kai den man di hustisia pero esaki tabata na Venezuela. El a ninga di ta esun ku a tira riba polis riba e dia en kuestion, kual despues a konfront’é ku tin indikashon ku e por ta esun ku a tira riba polis. Loke sigur a hala atenshon, ta e echo ku e venezolanonan ku a bai tira atrako huntu, a disidí ku nan ta kima otro dilanti mesa bèrdè.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.