Maestro detené ku awe wes komisario lo bai evaluá
si ta alarga su detenshon ku mas dia.

Willemstad— E tim ku ta hasi investigashon di kasonan inmoral a realisá aresto di un maestro di skol sospecha di a mishi ku alumno menor di edat.

Tabata djaluna ku e tim a pone man riba un maestro di skol den arianan pariba di brùg ku ta wòrdu sospechá di a hasi su mes kulpabel na aktonan ku no por mira lus di dia. Detenshon di e maestro dis kol aki ta debí ku e ta wòrdu sospechá di a mishi ku un alumno menor di edat. Ta trata di kasonan sumamente delikado unda un mayor ta entrega su yu den man di un maestro pa esaki dun’é enseñansa pero esaki ta bin abusá di e konfiansa di e alumno indefenso. Mesora despues ku esaki a bira konosí a bai entrega un denunsia pa kual e maestro a keda arestá.  Awe ta e dia ku e maestro aki ta wòrdu presentá dilanti un wes komisario ku lo bai evaluá su detenshon pa asina wak si ta alarga su aresto ku ocho dia mas. Ayera a bai ku e maestro aki na e departamentu Forensiko pa asina por a hasi mas investigashon den su kaso. Pa privasidat di e víktima menor di edat lo no bai menshoná nòmber di e skol.