Back to Top
Responsive image
E korant di pueblo

Manifestantenan kier pa gobièrnu bai kas


June 25, 2020 • 3 minüt pa lesa

Willemstad,– For di den oranan di mainta ayera un grupo di suidadano a disidí di drenta akshon i a kuminsá kana bai Forti, pidiendo pueblo pa djòin. Mester bisa ku durante di e reunion di ABVO dado momento e trahadónan a sali bai laga direktiva di ABVO, hurista i tur sobra i a bai direkshon di Pòst 5 pa asina djòin e manifestantenan.

E grupo di manifestantenan primeramente a blòkia kaya na altura di Pòst 5 i despues di esaki nan a kuminsá kana pasando riba Schottegatweg na altura di Mangusa Rio direkshon Punda, kaminda nan a bai pa papia ku promé minister.

Por a tuma nota tambe ku nan tabata pidiendo otro gruponan tambe pa djòin i kual a sosodé tambe paso kada biaha e grupo tabata birando mas grandi.

E lucha aki no ta unu ku ta inkluí sindikato aden, sino ta grupo di siudadanonan ku ta sumamente rabia ku e aktual gobièrnu i nan gritu tabata pa GOBIÈRNU BAI KAS.

Trahadónan di e kompania di limpiesa tambe a forma parti.

Apesar ku no ta un akshon di sindikato, dado momentu PWFC a manda kahanan di awa pa e grupo i a bisa ku tambe lo manda kuminda pa nan. Pues no ta un akshon sindikal, pero lógikamente ku tin hopi sindikato ku ta djòin un lucha sigur ora ku ta trata di un lucha di pueblo pa salba pais.

Mester bisa ku Lon Mutueel ku ta un di esnan na kabes di e akshon di ayera dado momentu a pidi maestronan di skol pa nan tambe djòin e grupo na altura di Fokkerweg riba ruta pa yega Punda  E grupo a sigui su ruta i a drenta Punda i asina a kana yega Forti. Na nan yegada na Forti e grupo basta grandi di persona den akshon  a bin topa ku un kordon traha pa Polisnan di Punda i tambe esnan di Forti. Mirando e multitut e polisnan aki no por wanta e personanan den akshon i  asina e grupo a pasa  nan bai i a kuminsá forsa e porta di heru pa por a drenta Forti. Despues di a logra di habri e porta di heru a pasa bai na e entrada di Forti ku e intenshon pa drenta paden pa bai sera Promé Minister Ruggenaath. Tabata na e momento ei ku a pidi mas asistensia polisial pa asina trata di wanta e grupo ku tabata birando mas agresivo.

Dado momento e polisnan no por a evitá ku e multitut kier a bai paden.

Miéntras ku tur esakinan tabata tumando lugá Minister Rhugenaath no a sali pa enfrentá e grupo di manifestantenan. Dado momento asta e manifestantenan a logra di habri bentana i a drenta den e edifisio pero despues di un intermediashon a sali bek for di e edifisio di Forti.  Vigilante mester apuntá ku ta basta problema i bochincha tabatin na Forti kaminda hasta dado momentu un agente polisial lo mester a lòs un tiru pa trese trankilidat, pero esaki a funshoná kontrali i a pone kue  manifestantenan a bira mas agresivo. Den e kura di Forti esta riba e lugá pa stashoná outo tabatin algun di e manifestantenan ku a subi para riba e outonan i asta a kometé basta destrukshon na esakinan. Prinsipalmente e vehíkulo ku sa ser usa pa transportá Promé Minister a ser destruí. Dado momento e tim di Riot di VKC a presentá pa asina evitá ku e manifestantenan por a drenta e edifisio di Forti.

Basta problema e Riot Tim tabatin pa kontrolá e situashon i hasta a hasi uso di gas lakrimogeno i tambe balanan di rùber pa plama i kore ku e manifestantenan for di den Forti.

A basha bai na e entrada di Forti.
Kos a bin kambia ora ku e Riot Team di VKC a hasi uso di gas i tambe bala di rùber.
Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.