Willemstad— Un total di 41 turista di e barku krusero Celebrity Millennium a bishitá Parke Nashonal kua ta konosí pa su bista espektakular riba olanan ku ta suta kosta parti nort di nos isla.

E barku ta parti di Celebrity Cruises, un liña krusero ku tin Sint Maarten komo haf prinsipal. Tur e pasaheronan i tambe miembronan di personal ta kompletamente bakuná. Pa motibu di e reglanan sosial di Corona tin mas o ménos 500 pasahero na bordo, kaminda e krusero tin un kapasidat pa 2.450 pasahero.

E kompania di krusero a pone medidanan severo pa e parke pa asina prevení kontaminashon. Por ehèmpel, otro bishitantenan no por a uza e tualètnan di e parke durante e bishita di e turistanan di krusero i e tualètnan mester a wòrdu minusiosamente limpiá. Tambe mester a mantené distansia sosial for di e otro bishitantenan di e parke. Tur miembronan di personal mester a yena un deklarashon di salú i nan mester a midi temperatura adelantá. Tur e medidanan aki mester a wòrdu bon kordiná.

Normalmente Parke Nashonal Shete Boka ta risibí masomenos 90.000 bishitante pa aña. Pa motíbu di regreso di turismo krusero, bakunashon i ampliashon di e medidanan di Corona Parke Nashonal Shete Boka ta spera di risibí mas bishitante.