Mullet Bay.

Skalo— E tereno mas balioso na St. Maarten, Mullet Bay ta pendiente tratamentu den korte sivil na Kòrsou den kaso Ennia. Un desishon e luna aki, por ta un inisio pa kisas na 2022 isla di St. Maarten por tuma un desishon definitivo riba e tereno unda un tempu tabatin e hotel mas grandi di Karibe.

E tereno di Mullet Bay ta sentral den e problema di sakeo na Ennia. Den bukinan di Ennia, e tereno na Mullet Bay ta balorá na 460 mion florin. Ansary nunka mas no a laga drecha e hotèl despues ku orkan a destruí Mullet Bay Beach Resort kompletamente. Tabata un hotèl di 700 kamber,  9 restorant, un playa, 2 pisina, 2 kasino, 1 sentro di kompra, 1 supermerkado i un kancha di gòlf. E tereno a keda para bashí dòrná ku apartamentunan ruina. E balor di 460 mion riba balansa di Ennia semper tabata kuestionabel, pero Hushang  Ansary a uza esaki pa por a uz’é komo bòrg di invershonnan atkerí fo’i fondonan di Ennia Leven, Schade i Zorg.  For di 2015, Banko Sentral tabata ordenando Hunta di Komisario di Ennia Caribe Holding pa eliminá e tereno fo’i riba e balansa di nan konsorsio i apuntá e invershonnan i propiedat likides di kual a saka fo’i dje mesun kompanianan bou di maneho di mesun direktornan. Ennia a ninga di hasi esaki i Banko Sentral a kuminsá hole e problema ta bini.

Banko Sentral a laga re-balorá e tereno di Mullet Bay na St. Maarten. Aktualmente, e tereno ta bou di beslag inkluso e hotèl riba dje, The Towers. Despues di a haña outorisashon pa imponé e medida di emergensha, mesora Banko Sentral ku asistensha di Ministerio Públiko na St. Maarten a laga pone beslag riba e tereno. E tereno a wòrdu balorá na hopi mas ménos i aktualmente ta pendiente tratamentu den korte sivil na Kòrsou. Mullet Bay a kai bou di beslag despues ku Banko Sentral ta konfirmá e sospecho ku mayoria dje sèn ku Ennia a saka sin supervishon for di e kompanianan Ennia Leven, Schade i Zorg, lo ta invertí riba bolsa di invershon na New York. Banko Sentral awor tin mihó bista unda e propiedatnan i aktivá di Ennia ta repartí i distribuí. E siguiente fase lo bira pa pone nan bek unda nan mester ta den e struktura di Ennia. Pa por logra esei, mester buska tambe e aktivonan ku ta riba teritorio Estado Unidense. Banko Sentral a  inisiá e proseso pa aserka un korte riba teritorio estado unidense pa por dekretá rekonosementu di e medida di emergensha imponé na Kòrsou konforme nos kortenan. Esei a logra unda a akapará 400 mion bek. Ainda falta 850 mion florin pa rekobrá.