E relashon inverso entre gravedat di infekshon ku Covid-19 i inmunidat ku ta protehá.

PUNDA- E meta prinsipal den desaroyo di bakuna ta pa evitá infekshon kompletamente, esaki mayoria bia no ta logra. Sinembargo historia di bakunashon di malesanan infeksioso ta mustra redukshon di kantidat di kasonan kousá pa vírusnan ku ta trese malesa grave. Dor di redusí e kantidat di vírus den personanan individual pa medio di bakunashon, por kombatí plamamentu di e vírus den un poblashon, i kontrolá e pandemia aktual di Covid-19.

Bakuna ta un maravia den mundu di medisina. Poko intervenshon tin e resultado di a salba miónes di bida na mundu. No ta tur bakuna ta funshoná meskos i na mes momentu no ta tur ta duna mesun nivel di protekshon. Tin bakuna ta evitá síntomanan di malesa i otronan por evitá infekshon ku e vírus por kompletu. Prevenshon di infekshon kompletu ta mihó konosí komo inmunidat sterilisante den mundu sientífiko. Nifikashon mas detayá di esaki ta ku e vírus konserní no ta haña chèns pa drenta e kurpa humano pa repliká dor ku e sistema imunológiko blokia e vírus su akseso na sélulanan humano.

Tin un diferensia chikí pero sumamente importante pa prevení malesa i infekshonnan. Un bakuna ku ta solamente prevení síntoma di malesa no ta stòp transmishon di e vírus na otronan. Miéntras un bakuna ku ta duna inmunidat sterilisante ta para trayekto di e vírus.

Den un mundu ideal, tur bakuna lo tabata indusí inmunidat sterilisante. En realidat, ta ekstremadamente difísil pa produsí bakunanan ku ta para infekshon ku e vírus kompletu. Mayoria bakuna ku mundu konosé awendia no ta logra esaki. Por ehèmpel, bakunanan kontra ‘rotavirus’, kual ta kousa diaree den beibi, por solamente prevení gravedat di e malesa. Tòg bakunanan a demonstrá di ta di balor haltu pa manehá malesanan. Den e kaso di ‘rotavirus’, e bakuna, ku a keda introdusí na 2006, ta duna un reduskhon di hospitalisashon di 90%. Un situashon similar ta okurí ku e bakunanan aktual kontra e vírus di polio, i tòg tin speransa ku den korto tempu e vírus lo keda eradiká mundialmente.

E bakunanan aprobá kontra e vírus di SARS-CoV-2 a mustrá di ta sumamente efektivo den redukshon di e vírus. Apesar di esaki, ainda no ta konosí si e bakunanan aki por indusí inmunidat sterilisante. Sientífiko i médikonan ta spera di por haña kontesta riba esaki asina ku tin mas datos publiká di investigashonnan klíniko ku na e momentunan aki ta wòrdu hasí.

Inmunidat individual
Ta importante pa komprondé e nifikashon bakunashon sin inmunidat sterilisante. Brevemente bisá, si un persona keda eksponé na un vírus (Covid-19) despues di a keda bakuná, e por wòrdu infektá pero ku síntoma mínimo òf sin ningun síntoma. Esaki debí ku e respuesta imunológiko indusí pa e bakuna no por para tur e partíkulanan di vírus pa repliká.

Por lo general ta konosí ku mester di un tipo di antikuerpo spesífiko, yamá antikuerpo neutralisante, pa yega inmunidat sterilisá. E antikuerponan aki ta blokia e vírus di drenta sélulanan humano i evitá replikashon. Sinembargo, e vírus konserní mester ta idéntiko na e vírus di e bakuna pa indusí e antikuerpo perfekto. Fortunadamente, e respuesta imunológiko indusí pa e bakuna ta involukrá diferente sélulanan i komponentenan di e sistema imunológiko. Asta si e respuesta imunológiko di antikuerpo no ta optimal, otro aspektonan di e memoria imunológiko por aktivá i batayá e vírus si un persona keda eksponé. Di e manera aki replikashon di e vírus ta baha, kual ta kousa redukshon den malesa.

E informashon aki ta konosí dor di años di investigashon riba e vírus di influenza. E tipo di bakunanan aki ta duna protekshon kontra di malesa, pero no nesesariamente ta protehá kontra infekshon. Motibu di esaki ta dor ku tin diferente variante di influenza ta sirkulá, un situashon similar na esun aktual di Covid-19. Ta importante pa realisá ku maske e bakunanan, por ehèmpel kontra influenza, no por indusí inmunidat sterilisante nan ta keda ekstremadamente balioso pa kontrolá e vírus.

 Inmunidat den populashon
Hopi ta kuestioná efekto di bakunashon kontra Covid-19 si no por garantisá inmunidat sterilisá. Motibu pa esaki ta preokupashon ku e vírus di Sars-CoV-2 simplemente lo keda infektá hopi hende si e bakuna no ta para infekshon di e vírus.

Personanan infektá asintomátikamente por lo general ta produsí e vírus den un nivel muchu mas abou. Ounke no ta un relashon perfekto, generalmente mas vírus ta trese mas infekshon i mas malesa. Dor di esaki, personanan bakuná tin ménos chèns pa transmití sufisiente vírus pa kousa malesa severo. E fenómeno aki a keda probá na paisnan ku un porsentahe haltu di personanan bakuná manera Israel. Ku mas di 60% di nan poblashon bakuná, kantidat di infekshon, hospitalisashon i morto a baha drástikamente.