Despues di un temporada basta largu, nan ta bèk den kaya.

WILLEMSTAD,—-Orquesta Pegasaya ta kla pa ranka sali bèk, despues di un temporada largu sin presentashon dor di e pandemia. Sin lugá a duda Orquesta Pegasaya por wòrdu konsiderá komo un instituto musikal ku nan mas ku 35 aña di eksistensia.

Hopi ta e músiko- i kantantenan di taya ku a yega militá den e agrupashon musikal aki ku a wòrdu fundá na sèptèmber 1985. Di informashon risibí tin indikashon ku nan agènda lo ta kargá atrobe, manera normalmente ta e kaso. Ounke ku e promé presentashon ku tabata planeá ku entre otro Kassav a wòrdu kanselá pa motibu di hospitalisashon di Jacob Desvarieux, kende ta e kitarista i ko-fundador di e eksitoso agrupashon mundialmente konosí. Seguidamente nan lo presentá na un festival habrí na Maastricht , siguí pa presentashonnan di fakansi park i nan promé enkuentro den historia ku Cache Royale.

Durante e pandemia Orquesta Pegasaya no a para ketu. Bou di mando i guia di nan trombonista Otmar Cornelia, nan a lansa un produkshon yamá “Wij willen winnen winnen”, ku letra i kanto di e propio ‘Otty’ Cornelia. E produkshon ku tabata netamente pa e kampionato di futbòl Oropeo a hala hopi atenshon i hasta riba e plataforma di ‘Tik Tok’. Lástimamente ku Hulanda no a yega final loke a pone ku e durashon di e éksito, no tabata tan largu. Seguidamente e letranan a wòrdu ahustá pa weganan Olímpiko, ku a kaba di kuminsá pa asina keda den pantaya. E kansionnan aki ku letranan profundo tambe ta konta pa hóbennan ku por ehèmpel ta bai studia na Hulanda pa yuda reforsá nan motivashon pa logra i gana (Winnen!) den bida!

Ku e produkshon aki Orquesta Pegasaya, a kompletá nan di 20 produkshon musikal despues di nan CD ku a hala atenshon internashonal titulá “Orquesta Pegasaya Pa’l mundo entero”, ku a hiba nan asta Jakarta Indonesia pa presentashonnan. Piesanan ku na Kòrsou  a yega di zona ta nan kansionnan, “Oh Mama”,  “Amor no ta pordoná” i “ABB” (Jesey Isenia), “Pretendé”(Rosanne Melfor) i“Pegaton”(Reinier Lijfrock).