Back to Top
Responsive image
E korant di pueblo

Pakete di Pais ta inevitabel pa kabinete nobo


April 17, 2021 • 3 minüt pa lesa

Pik Pisas: si Pisas karga e kabinete, e ta haña un krenwa di kabinete anterior pa lokual ta trata Pakete di Pais.

Punda—E Maneho Finansiero i Reformashon Ekonómiko mester ta prioridat pa kabinete nobo. Prinsipalmente despues di un di dos lockdown, kual lo trese e retrasonan nesesario. Efektonan di Covid riba desaroyo ekonómiko di Kòrsou i maneho finansiero di gobièrnu tin konsekuensha severo pa Kòrsou.  Esaki ta lokual por konkluí for di sifranan di 2020 pero tambe riba lokual Gobièrnu di Kòrsou a komprometé ku Hulanda.  Un kompromiso ku e kabinete nobo  MFK-PNP, no por desviá.

Ruthmilda Larmonie, huntu ku Pisas tin di karga ku e
responsabilidatnan pa ehekutá Pakete di Pais

Pa lokual ta trata e áreanan di atenshon pa e Pakete di Pais, lo no tin kambio pa Pisas i su grupo. Na e momentunan aki  en total tin 8 área di atenshon riba agènda pa ehekushon di e Pakete di Pais. Ta trata di un seri medida ku Kòrsou a trata na ehekutá na vários okashoná den pasado inisiando for di 2018.  

Maneho Finansiero:  E intenshon ta pa yega na un mihó kòntròl di fondonan públiko.  E fondonan ku Kòrsou ta kobrando mester wòrdu gastá responsabel. Di e manera aki por invertí mas efisiente. Evaluashon di e Maneho Finansiero a wòrdu definí den diferente sup sistema i despues di 3 luna ta evaluá. Tambe ta bai evaluá e proseso kon ta yega na kalkulashon di presupuesto i supsidionan gubernamental i kon nan ta wòrdu uza efektivo i efisiente. Na 2020 Kòrsou a kobra riba 300 mion ménos na impuesto i na 2021 lo no ta muchu diferente.

Reforma Ekonómiko: Kòrsou mester di un ekonomia fuerte. Ta e intenshon pa mehorá klima pa hasi negoshi i desaroyá un mihó maneho  pa loke trata tereno di gobièrnu. Den kuadro di esaki lo lanta un kompania pa manehá e propiedat i tereno di gobièrnu. Ademas di esei, Hulanda a pone na disposishon e posibilidat di un Fondo di Garantia di 44 mion florin pa stimulashon di ekonomia.

Enseñansa:  Gobièrnu a hasi un internalisashon pa evaluá e kalidat di enseñansa i wak kon pa drecha esaki. A inventarisá tambe e estado físiko di e skolnan i wak kon pa drecha. Na 2020 a aprobá sosten finansiero di Hulanda pa invertí 33 mion.

Kuido i Salubridat: ta pone enfoke pa frena e pandemia di Covid. Mester krea kuido médiko pagabel i yega na e medionan responsabel pa atendé ku e kuido i hasi esaki aksesibel. Cft a komprometé mas envolvimentu den maneho durante 2021 miéntras mester determiná 66 mion fiansa for di benta di UTS.

Efisiensia di Aparato Públiko: na Kòrsou tin 70 mil persona den forsa laboral i fondonan akapará no ta sufisiente pa mantené esaki den operashon. Pa e motibu aki ta bai oumentá efektividat den kompanianan i servisionan gubernamental. E idea ta pa traha kualitativo i efektivo. Mester redusí gastunan di gobièrnu na 20% den e próksimo 5 aña. Pa 2021, ta planiá pa efektuá e asina yama VVU unda por lo ménos 600 ámtenar ta baha fo’i aparato.

Sistema di Impuesto: E sistema di kobransa mester bira un sistema fásil pa ehekutá i ku por garantisá stabilidat ekonómiko.  Durante Covid, kombiná ku problemanan okashoná pa kandela na Ontvanger, kabinete nobo mester buska un balansa pa organisatorio e sistema di impuesto ta funshoná mas optimal.

Sektor Finansiero: mester bini stabilisashon di nos sektor finansiero. Esaki dor di trese stabilidat ekonómiko i  modernisá e sistema legislativo pa yega na un areglo di depósito pa bankonan komersial unda tin garantia di un montante mínimo ku e kliente ta haña bek na momento e banko drenta den problema.  Ta kabando ku  e problemátika di Giro, pero e kabinete nobo ta hañ’é konfrontá ku finalisashon di e pagonan.

Login