Back to Top
Responsive image
E korant di pueblo

Penshonado kier sa kon i ken na Vidanova a pèrdè 10 mion florin fo'i nan fondo di penshun


June 23, 2020 • 3 minüt pa lesa

Vidanova entretantu ta un banko asosiá. Temporada a
fia e sèn ainda Vidanova tabata den forma di un instituto di penshun.

Willemstad—-Mi ta un èks empleado, lider sindikal i penshonado di e kompania di utilidat Aqualectra ku sigur tion un prekupashon sumamente grandi despues ku sen di mi penshon a disparse.   

Manera mi ta asumí ta konosí  ku Korte den Promé Instansia di Kòrsou a terminá e bankarota di e kompania Blue Factor B.V., den su veredikto di 22 di òktober 2019. Blue Factor B.V. manera bosnan sa, ta un kompania ku a pertenesé na e konsorsio di kompania manera entre otro, Blue Liaison Holding N.V., Blue Liaison Financial Group N.V., Blue Liaison Corporate Finance N.V., Blue Liaison Finance B.V., Blue Liaison Real Estate B.V., Blue Factor (Aruba) N.V. i Blue Factor (St. Maarten) B.V. tur ta forma parti di e konsorsio aki. Na momentu ku Blue Factor B.V., a bati bankarota e kompania aki tabatin un debe di ANG 10.025.352 na Stichting Vidanova Pensioenfonds (Vidanova).

Tin tur indikashon ku Vidanova a fia Blue Factor B.V. e suma aki for di fondonan di Vidanova ku ta destiná pa paga primanan di penshun di e penshonadonan di e kompanianan di utilidat. Manera bo sa, e trahadónan aki ta kontribuí na e fondonan pa Vidanova por paga e penshun di e empleadonan aki ora ku nan yega nan edat di penshun, manera ta e kaso ku mi persona. Ta p’esei ta sumamente remarkabel i kuestionabel ku Vidanova no a pèrkurá pa sufisiente seguridat di biennan adekuá, pa garantisá ku Vidanova lo por rekobrá e sumanan ku a ser fia na Blue Factor B.V.. Esaki pa medio di “collateral” manera propiedatnan di Blue Factor B.V. komo garantia pa e fiansa aki. Manera bosnan  sa dor di e bankarota di Blue Factor B.V., e último aki miéntras tantu, a materialisá su mes. Tin tur indikashon ku e fayo aki di Vidanova a kondusí na pèrdida di fondonan mionario di depositantenan. Esta e fondonan ku ta destiná pa nos, esta e penshonadonan. Komo konsekuensia Vidanova no por rekobrá ningun parti di esaki di Blue Factor B.V., ku, den kuadro di su bankarota, a keda plan barí.

Sin mas por konkluí ku gerensia di Vidanova a manehá e fondonan di un forma iresponsabel. Esaki a tuma lugá di forma kompletamente deskabeyá i inakseptabel. No ta akseptabel ku Vidanova, ku konosé tantu un direktiva komo un hunta di supervishon ku ta konsistí di profeshonalnan riba tereno finansiero, por a fia mas ku 10 mion florin sin pèrkurá pa Vidanova tin sufisiente garantia adekuá pa garantisá ku Vidanova por rekobrá e fondonan ku el a fia bek. Na mi opinion, ta konfirmá ku tabatin mal maneho di parti di gerensia di Vidanova den e kuadro aki i gustosamente mi ke tende di hunta di supervishon di Vidanova ki pasonan Vidanova a tuma kaba i/òf ta kontemplá di tuma pa koregí esaki i rekobrá e fondonan ku a bai pèrdí te ku awor. Tambe mi ke tende si Vidanova, durante e bankarota di Blue Factor B.V., tabatin kontakto ku e kurator. E kaso aki ta hopi serio.

A pone komo garantia un pakete di “vordering” di Blue Factor B.V. riba debedónan, di ken na momentu ku Blue Factor B.V. a empeñá esakinan na Vidanova, ya tabata konosí ku nan no tabata kapas pa kumpli òf di tur manera ya no tabata kumpli ku nan obligashonnan i di ken no por a spera tampoko ku nan lo por òf lo a bai kumpli ku nan obligashonnan. Konsekuensia di esaki ta ku awor no tin forma, sigur no fásil pa rekobrá e fondonan di esnan ku ta responsabel pa e debakel. Ku konsekuensia ku a hit nos fondo pa mas di 10 mion florin. “

Tumando e situashon deskribí na konsiderashon, mi ta partisipá ku si mi no haña un kontesta satisfaktorio riba tur mi preguntanan menshoná por eskrito, den dies dia despues di e karta aki, mi lo aserká tantu e sindikatonan di Aqualectra ku ta risibí un kopia di e karta aki, komo e penshonadonan di Aqualectra i otronan ku lo por sirbi nos interes di penshonado, pa buska pa sa kon por rekobrá nos sènnan pa kua nos a traha hopi duru i ku a somentá di forma dudoso den Vidanova.

Nos sènnan, pa kua nos a traha hopi duru, no por disparsé den saku di otronan, sin ku ta bin un investigashon kompleto i un splikashon konkreto i akseptabel òf sin ku niun hende ta para responsabel pa esaki. P’esei mi ta atvertí ku si mi mester tuma pasonan konkreto pa sa e bèrdat òf pa eksponé esnan, ku segun ami ta responsabel mi lo hasi esei tambe debí ku aki nos no ta papia di un depchi, pero di miónes pa kua ami i mi koleganan a traha hopi duru durante kasi henter mi bida ku e meta pa mi lo por tin mi penshun i por disfrutá di esaki.

Atentamente,    Errold Bishop

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.