Segun Dr. Gerstenbluth investigashon ta kanando pa wak si personanan ku ta sufri di Long Covid por benefisiá di un “booster shòt”

PUNDA- Komo ku aun no tin un tratamentu óptimo pa personanan ku ta sufri di “Long Covid”, sientífikonan médiko ta averiguando si e personanan aki lo benefisiá di un èkstra shòt di bakuna komo refuerso pa nan sistema inmunológiko. Esaki epidemiólogo lokal, Dr. Izzy Gerstenbluth a duna di konosé durante e rueda di prensa ku a tuma lugá 15 di yüli último.

Algun persona ta keda ku síntoma pa un temporada largu despues di infekshon ku e vírus di SARS-CoV-2. E nòmber sientífiko stipulá na esaki ta Long Covid òf PASC, kual ta para pa Post-Acute Sequelae òf SARS-CoV-2. E síntomanan aki por persistí pa vários siman, te ku lunanan, despues di e infekshon ku Covid-19.

E síntomanan ku personanan ku long Covid ta keda eksperensiá mayoria bia ta kansansio, difikultat pa hala rosea, doló den pechu, doló muskular, doló di kabes, batimenti iregular di kurason, pèrdida prolongá di holó, depreshon i problemanan di memoria. Algun di e síntomanan aki por dura sumamente largu, pero segun investigashonnan hasí e gravedat di e síntomanan ta redusí ku tempu.

Aun no ta konosí eksaktamente dikon algun persona si ta keda ku síntoma pa largo plaso despues di infekshon i otronan no. Segun sientífikonan esaki por tin di haber ku edat haltu i e síntomanan ku e persona a eksperensiá den e promé fase di e infekshon ku Covid-19.

Personanan ku a ser hospitalisá pa motibu di infekshon ku Covid-19, personanan ku un BMI (peso) haltu i personanan ku ta sufri di asma ta mustra di tin mas chèns pa sufri di e síntomanan di long Covid. Sinembargo, personanan no hospitalisá tambe por keha di síntomanan persistente di long Covid. Ademas, long Covid ta okurí ku mas frekuensia den hende muhé. Esakinan segun publikashon di investigashon sientífiko riba wèpsait di RIVM.

Despues di un infekshon grave ku Covid-19, pashèntnan tin bia ta keda ku funshon redusí di pulmon pa lunanan largu despues ku nan tabata hospitalisá. Tambe por opservá apnormalidat riba skèn di radiografia den algun di e pashèntnan aki.

Investigashon riba long Covid aun ta kanando. RIVM aun ta kondusí estudionan pa averiguá kon largu e síntomanan di personanan afektá pa long Covid ta dura. E kantidat spesífiko pa loke ta trata e frekuensia ku long Covid ta aparesé  tampoko no ta konosí ainda. Segun estimashon inisial, 1 den kada 5 persona te ainda ta sufri di síntoma pa 4 te 5 siman despues di a tèst positivo pa Covid-19. E kantidat aki ta redusí 12 siman òf mas despues di infekshon, segun RIVM.

Ademas, universidatnan na Reino Uní tambe tin diferente investigashon kanando pa loke ta trata long Covid i tratamentu pa esaki. Un di e investigashonnan kanando ta si personanan ku ta sufri di long covid lo benefisiá di un èkstra shòt di bakuna. Esaki debí ku sientífikonan médiko di Reino Uní a raportá ku algun persona ta eksperensiando alivio di e síntomanan di long Covid despues di a risibí e bakuna. Tambe ekspertonan ta investigando kua faktornan ta hunga un ròl den oumento di riesgo pa síntomanan di long Covid, esaki ta un stap importante pa prevenshon i tratamentu di long Covid.