Willemstad,– Parlamentario Rennox Calmes a bisa ayera durante reunion públiko ku Corona vírus ta kibrando nos ekonomia, hendenan ta pèrdiendo trabou, kasnan di famia sufriendo, empresarionan pensando ken ta sera e porta último biaha, temor pa pago di awa, gas, kuminda ets.

“Nos komo parlamentario no por bira kara i no por skonde tras di rapòrt ets. Pueblo tin hamber pa mira parlamento tambe tuma akshon. Laga ta kla pa ami, sigur mi por imaginá insertidumbre ku ta biba den kas. Tur esnan ku a pèrdè trabou no kier ni sikiera mira anochi yega, paso esei ta nifiká un otro mañan i asina fin di luna ta yega i nan no sa kua banda kue.

E ta pidi pa parlamento move i manda mensahe na nòmber di komunidat. Si mester entrega algu, solidaridat mester ta algu pa nos tur, kuminsando na direktornan di fundashon nan di gobièrnu i tambe sektornan priva. E ta bisa ku e akto aki ta dividí nos mas i ta basta pa laga esnan mas privile
giá, sigui dividí nos mas, anto pueblo mes ta keda sin ayudo pa nesesidatnan básiko.

Señor Calmes ta bisa ku loke el a siña di mama ta ku kaminda un por kome, dos tambe por. “Union ta hasi forsa maske kual rango bo tin. Maske nos rekurso finansiero ta limitá, nos no por sigui warda. No por warda riba mas rapòrt. Komo parlamento nos tin nos propio responsabilidat i mester kumpli ku esaki mas tantu posibel”, tabata palabranan di Rennox Calmes durante reunion públiko di parlamento ayera.