Back to Top
Responsive image
E korant di pueblo

Riba un dia manera awe !


May 22, 2020 • 2 minüt pa lesa

WILLEMSTAD—Awe ta djabièrnè dia 22 mei 2020, unda ta fecha ku un biaha mas nos ta bai den pasado pa loke ta deporte lokal. Un ke otro rekordando kualke evento, resultado i/òf logro ku tabatin riba e fecha aki, tantu aña pasá na aña 2019, komo tambe 2 aña pasá na aña 2018. Esaki pa loke ta eventonan ku a tuma lugá riba nos isla, òf ku nos deportistanan den akshon den eksterior.

2018

Pa loke ta e fecha 22 mei 2018, ku tabata riba un djamars, awe Deporte Vigilante ta rekòrdá ku bo lo siguiente….

Beisbòl
Riba e fecha aki, tereno di parke Tio Daou, tabata esenario pa kontinuashon di e kampionato di beisbòl AA, na momentu ku Sta Rosa Indians i Royal Scorpions a enfrentá otro, den wega ku a konosé 21 kareda i 27 hit. Tabata e indjannan ku ta gana di e skorpionnan 12-9, den un fiesta di hit, unda e ganadónan a konektá 13 hit, miéntras ku e pèrdèdónan tabatin 14 hit konektá.

Atletismo
Riba e mesun dia, e atletanan Rachid Rosalina i Benjamin Phelipa a logra kada unu medaya di oro, den atletismo na Grenada. Esaki na momentu ku un delegashon di atletanan lokal a kompetí. Rachid a logra Oro riba distansia di 800 meter, miéntras ku Benjamin tambe a destaká, logrando medaya di Oro, unda ku inkluso e la pone un rèkòrt nobo.

2019

Miéntras tantu riba dia 22 mei 2019, ku tabata un djarason, Deporte Vigilante tin lo siguiente pa kompartí….

Futbòl
Tabata fecha ku a konosé e di 6 wega di e buèlta di Playoff Kaya 6 den promé divishon FFK, bálido pa temporada 2018/2019 su kampionato. Tereno di Stadion Antoine Maduro na Kintjan tabata esenario, unda ku Vesta a topa i gana di e trikolornan di Jong Holland, 2-0.

Ámbos gol a keda anotá for di den e parti inisial, miéntras ku Vesta a finalisá partido ku 2 hungadó ménos, despues ku Jean Carlos Arion, na di 74 minüt i Carlos Koeiman na di 90 minüt, a risibí kada unu nan di 2 karchi hel, ku a bira nan ekspulshon.

Jose Landaeta a habri anotashon na di 9 minüt, pa seguidamente e hóben Sidney Kastaneer a oumentá, despues di un tremendo hugada, pasando ku gran fasilidat entre defensornan trikolor.

‘Ziño’ Constansia, ku markashon di ‘Pòng’ Espacia (8), durante di e wega.

Vòlibòl
Tabata fecha tambe ku tabatin kontinuashon di e seri final den vòlibòl femenino superior den sala deportivo Errol Rooi na SDK, unda ku Stakamahachi ta gana di Shuatanari i ta bai dilanti 2-0 den e seri mihó di 5 wega. Esaki pa asina pone ‘Shuata’ lomba kontra muraya. E wega a kaba ku skor di 3-1, ku sètnan di 28-26, 25-14, 22-25 i 25-23.

Mas di akshon den e wega di ayera, ku ‘Staka’ a gana di ‘Shuata’ na SDK.

Futbòl
Riba djarason 22 mei 2019, e ekipo di RKC Waalwijk, ku ta konta ku miembro di nos selekshon nashonal di futbòl Jurien Gaari, a logra un empate na 1 gol ku Excelsior.

Tabata den e segundo i desisivo wega den e semifinal, pa loke ta e seri di playoff di promoshon/degradashon pa Eredivisie. Un ke otro despues ku ya nan a logra triunfo den e promé wega, unda ku hustamente Jurien Gaari tabata esun ku a sòru pa e gol pa su ekipo gana 2-1.

Ku e resultado ariba menshoná, nan ta degradá Excelsior i asina a sigui, unda ku durante di e temporada tras di lomba, nan tabata parti di Eredivisie na Hulanda.

E futbolista Jurien Gaari.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.