Bakunashon durante periodo di embaraso

PUNDA- RIVM ta informá ku muhénan na estado por bakuná ku bakunanan ku ta basá riba teknologia di mRNA manera Pfizer i Moderna. Anteriormente e konseho tabata ku por bakuná solamente hende muhé na estado ku tin riesgo haltu pa keda infektá ku e vírus di Covid-19.

Komo medida di prekoushon a laga hende muhé embarasá warda pa tuma bakuna te despues di nasementu di nan yu. Motibu di esaki no tabata paso a spekulá ku e bakuna por ta dañino durante embaraso, sino paso no tabata tin sufisiente investigashon klíniko hasí riba e grupo aki. E mesun konseho aki a konta na Kòrsou tambe.  Na momentu ku RIVM a anunsiá ku a kambia konseho pa por bakuná hende muhé na estado ku Pfizer òf Moderna, tim di bakunashon lokal a  konfirmá na redakshon di Vigilante ku e konseho nobo di RIVM ta konta pa Kòrsou tambe.

Na Estádos Unídos mas ku 90.000 hende muhé na estado a keda bakuná ku bakunanan di mRNA. Segun RIVM ningun efekto sekundario grave no a paresé den e investigashonnan te awor. Pues dor di e resultadonan aki RIVM ta duna e konseho ku tur muhé embarasá ku ke bakuná por hasi esaki. Segun RIVM, no tin ningun prueba ku ta sugerí ku bakunashon por kousa daño durante embaraso. Sinembargo, ta rekomendá esnan na estado ku bakuná pa mèldu efekto sekundario riba wèpsait di Lareb. Esaki ta e sentro di investigashon pa seguridat di medikamentu durante embaraso na Hulanda. Ademas sientífikonan ta pone énfasis riba e echo ku e bakuna di Covid-19, meskos ku tur otro bakuna ku ta eksistí, no tin efekto riba fertilidat. Esaki ta basa riba estudionan ku a wòrdu hasi durante añanan riba bakuna.

Duna lechi
No tin ningun prueba ku e bakuna ta pasa di lechi maternal pa e beibi. E bakuna kontra Covid-19 por wòrdu suministrá na mamanan ku ta duna yu lechi di pechu si nan ta forma parti di e grupo ku tin riesgo haltu pa keda infektá ku e vírus. Motibu di esaki ta ku for di investigashonnan hasi durante añanan, sientífikonan sa ku e komponente di e bakuna (por ehèmpel mRNA) no ta pasa bai pa e beibi pero si e antikuerponan ku e mama a desaroyá. Esaki ta un manera pa protehá mucha kontra e malesa di Covid-19, ku anitkuerpo di su mama.