Oranjestad —- E variante britániko di Coronavirus ta sigui dominá na Aruba segun e rapòrt di e siman aki di Rijks Instituut voor Volksgezondheid en Milleu (RIVM). E instansia aki ta mustra ku te ku siman pasa, 80% di e kasonan di kontagio tabata konsekuensia di e variante ey. 

Den henter Karibe Hulandes, segun RIVM, ta práktikamente e variante so ta presente. Kada isla tin un kantidat diferente, unda ku Bonaire tin 100% di su kasonan ta e variante ei, sigui pa Kòrsou ku ta na 96.8%. Aruba tin e kantidat mas abou ku 80%.  Segun RIVM, banda di e variante Britániko, tin 1 di Brazil, 4 di Sur Afrika, 29 di California i 26 di New York. Esnan mas preokupante na Aruba ta esun Britániko i esun di Sur Afrika.