Willemstad,– E próksimo minister di VVRP señor Charles Cooper a splika ku na momentu ku e sinta komo minister, mesora e lo yama Flow/UTS pa asina papia tokante di e kalidat di servisio ku nan a bin ta duna na pueblo di Kòrsou.

El a bisa ku ta inakseptabel loke a bin ta sosodé i ku e ta kere ku BPT mester ta muchu mas fuerte ku FLOW. Pero nan ta skonde tras di un proyekto lei di minister ku tin mas ku un aña wantá.

Señor Cooper ta bisa ku e komo titular e ta yama Flow den su kantor i ta splika FLOW ku e servisio ku ta dunando na pueblo, ta inakseptabel i ku e no ta akseptá e servisio asina i ta duna nan un par di dia pa drecha e servisio rònt Kòrsou. E próksimo minister di VVRP ta bisa ku gobièrnu a bende UTS ku Flow i pues e si ta bai aktua i si nan no drecha e servisio, e lo kita nan lisensia for di nan.

Cooper ta bisa ku e asuntu di kumpra FLOW bèk, no ta un posibilidat, paso pais no tin sèn i e sèn ku a haña dor di e benta di UTS, a bai den Hospital. E ta bisa tambe ku no a haña tur sèn ainda.

Señor Cooper ta bisa ku for di inisio el a bisa pa no bende e infrastruktura ku UTS tabatin, pero e gobièrnu aktual no kier a skucha.

Señor Cooper ta bisa ku momentu gabinete Pisas sinta, lo atendé e asuntu aki ku man duru pa ku e servisio na komunidat di parti di FLOW.

E ta bisa tambe ku mester aktua i ku mester tuma medida, pues ta dependé di e aktitut di FLOW si lo por bini un kaso den korte. Por último Charles Cooper ta bisa ku nan ta aktua bou di un MB i den esaki tin un lisensia ku kondishonnan i un di e kondishonnan ta ku mester tin nivel.