E situashon di Covid na Kòrsou i nivel di infekshon ta peligrá kontinuidat di hopi negoshi

Punda—E gobièrnu di MFK i PNP lo tin un reto menasante pa lokual ta trata rekuperashon ekonómiko di Kòrsou. Esaki debí na prinsipalmente efektonan di Covid riba ekonomia en general i entrada di gobièrnu en partikular. Ménos pago na impuesto lo nifiká ménos rekurso finansiero pa manehá Kòrsou.

Na Kòrsou, ekstrapolando sifranan di gobièrnu, te ku òktober 2020, 143 mion florin ménos a drenta kaha di gobièrnu pa Impuesto riba Benta (OB). Dedusiendo efektonan ekonómiko, por lo ménos 88 mion florin den e retraso di kobransa riba OB ta debí na efektonan di Covid, atraves di medida imponé pa Gobièrnu di Kòrsou. Teniendo na kuenta un tarifa mínimo di OB na 6%, 88 mion  ménos na kobransa di OB entre aprel pa òktober ta yega na un efekto negativo riba benta kolektivo di negoshinan na Kòrsou di 1.5 miar florin durante e periodo di aprel pa òktober 2020.  Ku otro palabra, benta pa konsumo lokal di produktonan di servisio na Kòrsou entre aprel 2020 pa òktober 2020 a baha ku 1.5 miar florin, aproksimadamente. Esaki ta durante un periodo di 7 luna, di aprel te ku òktober. Ekstrapolando e sifra te ku desèmber 2020, por asumí ku e efektonan di Covid a kousa un bahada di 1.8 miar florin den benta kolektivo nashonal di negoshinan durante 2020. Esaki ta un sifra hopi mas haltu di lokual ekspertonan a kalkulá na inisio di aprel aña pas’a.

Kòrsou a habri na mart 2021 ku un di dos lockdown, kual na su turno tambe ta bai tin efektonan negativo i retraso den rekuperashon ekonómiko. Medidanan tumá na 2020, tabatin nan efektonan. Abase di un tarifa di OB na 6%, i abase di mas ekstrapolashon, Kòrsou a kobra 420 mil florin diario ménos na OB. Ta nifiká ku na mesun tarifa di 6% e benta total diario kolektivo di negoshinan ta 7 mion florin. 7 mion diario ménos na benta di aprel te ku desèmber ta nifiká 1.8 miar florin ménos en total na benta generá lokalmente na Kòrsou di parti di negoshinan. 1.8 miar florin ta igual na 1.800 mion florin. Esaki ta lokual efekto di Covid a okashoná na daño komersial riba Kòrsou te ku desèmber 2020. Pero si relashoná e sifra aki na lokual ekspertonan di IMF, Banko Sentral i konseheronan di gobièrnu a kalkulá tin diferente diskrepansha entre tur e kálkulonan.

E pronóstikonan di IMF, durante nan último sondeo na Kòrsou no ta muchu alentador. Segun organisashon monetario internashonal, Kòrsou su turismo lo sigui plat durante 2021 pa kuminsá oumentá leve na 2022 i yega tòp bek te na 2024. Sin a duna muchu aklarashon, nan a duna nan pronóstiko abase di porsentahe di kresementu. Segun IMF pa 2020 turismo lo akapará 38% di lokual a risibi na bishita durante 2019, pa 2021 esaki lo ta 38% tambe, pa 2022 lo bira 60%, 2023 80% i te ku 2024 Kòrsou lo yega 100% di e nivel na 2019. Pero, IMF no a inkorporá e variabel si Hulanda duna konseho di biahe pa islanan den Karibe. Esaki ta kambia tur pronóstiko. Manera IMF a menshoná, na e momentonan aki, e fuente prinsipal di divisa pa Kòrsou ta e depósitonan di Hulanda pa finansiamentunan di likides i programa di NOW. Un suma di kasi 700 mion florin na Euro a oumentá e nivel di divisa i kaso mantené e kobertura amplio.

E salida di 2021 no tabata muchu bon pa Kòrsou. Na 2019, Kòrsou tabatin un Produkto Nashonal Brutu di 5.6 miar florin. E bahada durante 2020, ta trese esaki na un pronóstiko di 4.3 miar florin i kisas pa mart 2021 lo e ta hopi mas abou. Kòrsou su bolsa di debe te ku desèmber 2020 por subi 4 miar florin i ku mas finansiamentu fo’i Hulanda ta pronostiká esaki pa oumentá durante 2021. Abase di e kalkulashon di IMF e relashon entre e bahada na 4.3 mira florin di e Produkto Nashonal Brutu kontra di un bolsa di debe di riba 4 miar ta hiba Kòrsou ta un kota di debe di kasi 100% ku probablemente na inisio di 2021 lo ta mas haltu sin yega na un solushon ku Hulanda.

Kalke bahada den Produkto Nashonal Brutu ta hinka Kòrsou  den mas problema. Kòrsou su problemanan finansiero ta birando mas serio.