Minister di Finansas Kenneth Gijsbertha

Punda—Konforme un kalkulo di Departamento di Finansa i presentá den nan último reportahe pa 2020, Kòrsou ta sera 2020 ku un surplus na likides di kasi 275 mion florin. Esaki ta debí na prinsipalmente un fluho di 640 mion florin di finansiamentu for di Hulanda. (otro kálkulonan ta totalisá 670 mion).

Sin e finansiamentu di Hulanda, Kòrsou lo a sera 2020 ku un défisit di kasi 370 mion florin. Maneho durante 2020 a generá un défisit di 400 mion florin i mester añadí adishonal invershon durante 2020 di 55 mion florin. E dos sumanan lo a krea un défisit di 455 mion florin, pero na inisio di 2020 a kuminsá ku un saldo positivo di 86 mion florin. E saldo positivo di 275 mion ta poné ku Kòrsou no mester di Sosten Finansiero for di Hulanda durante promé kuartal di 2021. Raymond Knops, e siman aki a konfirmá e notisia tambe.

Kestion ta bira kon Kòrsou ta bai kuminsá paga  Hulanda bek. Te ainda ni Hulanda i tampoko Korsou no ta dunando informashon riba esaki. Si sigui fia,  Kòrsou su debe lo yega 4.2 miar florin na 2021. Kòrsou su debe nashonal por oumentá mas tantu i surpasá 4.2 miar florin. Esaki si konsiderá ku presupuesto 2021 ta plania na sera ku un défisit di 681 mion florin. Sin un fiansa adishonal di Hulanda di por lo ménos 600 mion florin, Kòrsou no ta logra paga su gastunan durante 2021 tampoko. Minister di Finansas Públiko, Kenneth Gijsbertha den un reakshon na Vigilante a yega na duna di konosé ku Kòrsou ta leu fo’i bankarota. “Mi no ta di akuerdo ku bosnan” e titular di finansas públiko a duna di konosé. Segun Gijsbertha, i teorétikamente e tin rason un gobièrnu difísil por bai bankarota pasobra kréditornan no por bai korte kontra di gobièrnu mes fásil kompará den mundu komersial. Gijsbertha a splika ademas ku e total di debe nashonal no tei yega e Produkto Nashonal Brutu. E problema ta bira na 2021, ta kuantu e ekonomia lo kontraé.

Manera Gobièrnu di Kòrsou mes a indiká tin diferente elemento ku ta afektando e situashon. Unu ta e efektonan riba presupuesto di gobièrnu i na di dos lugá e efektonan riba sektor priva. Segun Jose Jardim a yega di enfatisá ku e enfoke mester bira pa mantené kuponan di trabou. Segun e Presidente Direktor interino di CBCS mester evitá ku empleadonan tei pèrdè nan kupo di trabou. Al final komo e di tres faktor mester bini un apoyo na e balanse di pago unda bo ta konfrontando un situashon ku bo motor di eksportashon den Union Monetario ta wòrdu afektá lokual ta okashoná menor entrada. Kòrsou debe Hulanda na e momentonan aki entre 3.1 pa 3.3 miar florin. Durante 2020 na repago Kòrsou a paga 108 mion florin.

Pa 2021, ta pronostiká e debe nashonal di Kòrsou na 4.2 miar, gobièrnu di Kòrsou mester bini ku un solushon lihé pa skapa konsekuenshanan makro-ekonómiko severo. Sin un proposishon di Hulanda pa restrukturá e debe nashonal, COHO ta e úniko èrmènt i opshon pa Kòrsou, despues ku Promé Minister Eugene Rhuggenaath a duna lus bèrdè pa enkaminá e proseso pa yena na e Lei di Konsenso.

Huntu ku e Pakete di Pais, e Lei di Konsenso COHO, Entidat di Karibe ta bai forsa Kòrsou na bende su propiedatnan i akshon den kompanianan anónimo. Aparte di ta duna indikashonnan konkreto den COHO, e trayekto ku Hulanda a kana for di 2018 ta konfirmá esaki. Tin dokumentashon unda ta proba ku Promé Minister Eugene Rhuggenaath a proponé na presidente di e PMO Groestrategie pa pone e plaka di benta den un bolsa, CDI, Curaçao Development Institute. PMO, Project Management Organisatie tabata e organisashon enkargá ku Strategia di Kresementu pa Kòrsou.