29 di aprel e promé kaso di atrako riba trùk di limonada a tuma lugá den Frederikstraat na Otrobanda.

Willemstad—- Sigur bon trabou di e polisnan di UST i tambe Handhaving por yuda solushoná e último kasonan di atrako ku a tuma lugá riba e dos trùknan di limonada di e kompania Coca Cola.

Ya pa un par di dia e tim di atrako a bin ta hasi investigashon riba dos kaso separá di atrako riba dos trùk ku ta repartí refresko na diferente establesimentu. E promé atrako tabata riba Frederikstraat na momento ku e trahadónan ku tabata den e trùk di limonada a keda atraká pa dos tipo kual un di nan sigur tabatin un machete den su poder. Bou di menasa a logra di kita e sèn ku a kaba di tuma na un establesimentu den Otrobanda mes despues di a entrega refresko. Tabata un botin di mas òf ménos 200 florin pero tambe a kita pertinensha di e trahadónan riba e trùk i tambe bai ku nan sèn.   Den e kaso tabata menshoná ku e duo atrakadó a kore bai na pia pa despues a mira un vehíkulo di e marka Hyundai kolo kòrá ranka bai.

Un par di dia despues otro atrako a ser kometé riba e trùk ku ta repartí refresko di e kompania Coca Cola. E biaha aki tabata riba Juan Hatoweg ku e trùk a wòrdu blòkia pa un vehíkulo kolo kòrá di e marka Hyundai unda e okupantenan arma ku machete a baha i a kita sèn di e benta di dia i tambe pertinenshanan di e trahadónan entre nan asta un telefon. E tim di atrako a presentá na e sitio pa asina por a kuminsá ku e demas investigashon. Djamars último e tim di UST  durante di nan kontròl a tuma nota di dos vehíkulo stashoná nèt enfrente di e Misa Coromoto na Piscaderaweg.  Mesora a blòkia e dos vehíkulonan pa asina por a hasi un kontròl. Durante di e kontròl  a bin topa un di e hòmbernan ku un tas den su poder den kual a bin haña droga.

Mesora e sospechoso a keda detené pa violashon di e lei di droga. A sigui listra den e vehíkulonan i a bin topa ku un telefon den e Hyundai kolo kòrá. A konfiská tantu e telefon komo e vehíkulo pa mas investigashon. Durante investigashon ku a sigui a bin tuma nota ku e telefon ku a ser haña den e vehíkulo kolo kòrá mester ta pertenesé na un di e trahadónan di e trùk di limonada ku a ser atraká. Tambe a bin hala atenshon ku e vehíkulo kolo kòrá di e marka Hyundai tambe ta kuadra ku deskripshon duna den tur dos kasonan di atrako riba e trùknan di limonada. Sigur ku e hayasgo di e telefon, solushonamentu di e dos kasonan di atrako riba e trùknan di limonada ta basta serka.