Back to Top
Responsive image
E korant di pueblo

Titorasz den korte awe pa skucha sentensia


June 26, 2020 • 2 minüt pa lesa

WILLEMSTAD,— Awe wes lo dikta sentensia den kaso di e hòmber Rashid ‘Titorasz’ Hato, ku ta wòrdu sospechá di poseshon arma kandela, maltrato i tambe destrukshon 22 febrüari tras di lomba. Esaki tabata despues ku na Parada di Tiner tabatin un problema ku a kalma pa un ratu i a bolbe eskalá despues ku e marcha a kaba di pasa. Segun e víktima nan den e kaso, ku ta doño di un empresa na St Helena, Titorasz huntu ku su amigu Recher Lacroes lo a saka arma kandela pa nan, bringa  ku nan tin tambe kousa destrukshon na nan propiedat. A pidi pa Titorasz sinta 36 luna plùs un kastigu bieu di 9 luna prizòn, unda awe wes lo dikta sentensia.

Ministerio Públiko a hasi un demanda di 36 luna pa Rashid ‘Titorasz’ Hato pa un kaso di poseshon arma kandela, maltrato, menasa i tambe destrukshon. Tantu Hato i su amigu Recher Lacroes a skucha un demanda di 36 luna prizòn pa e echo nan menshoná. Esaki despues ku tabatin problema Parada di Tiner unda esaki a bin kulminá den bringamentu, losmentu di bala i tambe ponementu di arma kandela na kabes di un di e víktima.

Tabata despues ku e amigu di e rèper Titorasz, lo a bai kumpra kos di bebe ku e víktima nan no kier a bende eis, ku e problema a inisiá. Aki a surgi un diskushon unda segun Recher ku durante e diskushon e empresario lo a koba su mama i indiká na dje ku e no mester di su plaka. E problema lo a kalma durante e marcha segun Recher, kual despues esaki lo a bolbe eskalá na momentu ku e marcha a kaba di pasa.

Segun e víktima ku tabata aki ku Recher lo a bin den su direkshon kual a stot i saka un arma kandela riba dje. E víktima a indiká ku den forsageo e la logra kita e arma kandela for di Recher, pero despues el a nota ku Recher lo a bin ku un otro arma kandela ku probablemente lo tabata pertenesé na Titorasz, kual a buta esaki na kabes di e víktima i bisé pa dun’é e otro arma bèk.  E víktima a splika ku e arma kandela tabatin un laser bèrdè i ku esaki ta igual na e arma kandela ku a keda konfiská algu ratu despues pa miembronan di kuerpo polisial.

Titorasz a bisa ku e no tabata den poseshon di niun arma i ku e no tabata den e problema mes. Segun Titorasz ku el a bai pa plakia e problema i kita Recher ku e empresario for di otro, kual ora e la yega pa hasi esaki el a haña sla i el a defendé su kurpa. El a bisa ku e no tabatin un arma i ku loke e polisnan a indiká ku e la benta un arma abou i kore bai no ta kuadra ku realidat. Mas aleu el a splika ku e no tabatin intenshon di bai bringa pero ora e la haña sla i e mester a defendé su kurpa.

Ministerio Públiko a indiká ku ya Titorasz tin 9 luna di prizòn kologá riba su kabes pa un kaso di droga 3 aña pasá, kual e tempu di prueba no a pasa ainda ora el a keda detené. A pidi pa e sinta e kastigu bieu i mas 36 una prizòn pa poseshon arma kandela, kual awe lo dikta sentensia. Recher tambe lo skucha sentensia awe despues ku a pidi 36 luna di prizòn pe.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.