Hato — Curaçao Airport Partners (CAP) su pronóstiko pa e promé kuartal di 2021 tabata koutelosamente optimista. Datos tabata mustra un oumento gradual den e tráfiko di pasahero komersial debí na e diferente restrikshonnan a kousa di e pandemia i e mutashonnan di e vírùs ku a keda detektá den nos merkadonan prinsipal.

Pa fin di e promé kuartal, nan a haña nan bèk den un situashon manera aña pasá i den un posishon muchu mas difísil ku un aña pasá. E realidat ku e promé kuartal lo tabata yen di reto ta kai chikí kompará ku e posishon prekario ku nan ta haña nan aden awor akí. E variante britániko di e vírùs a drenta i tabata devastador pa nos isla. Tráfiko internashonal ku a sali for di aki den Q1 di 2021 tabata liderá pa Oropa i Merka ku 57% for di Oropa i 12% for di Merka. Lamentablemente, tráfiko di pasahero a baha den yanüari ku -42% kompará ku desèmber 2020. Tráfiko den febrüari a subi ku +2% kompará ku yanüari, i den mart e tráfiko a baha ku -28% kompará ku febrüari. Debí na eskalashon di medidanan i rekisitonan, aerolíneanan di tantu Oropa komo Merka a hasi ahuste den nan skema di buelo i kapasidat di nan avionnan konforme e fluktuashon den e demanda.

No opstante e retonan sin presedente di 2020, CAP tabata kontentu na momento ku a risibí e informashon ku pa di tres aña konsekutivo Kòrsou a resultá den e tòp dies (10) di destinashonnan basá riba e moveshon di pasahero riba e ruta di Amsterdam- Kòrsou. Dubai i Atlanta a okupá e puestonan number unu (1) i dos (2) respektivamente. Konektividat entre e islanan di Karibe Hulandes a permanesé sumamente difísil pa pronostiká, debí na e oumento den presensia di e vírùs i e mutashonnan di esaki. Den e promé kuartal di 2021 Karibe Hulandes a representá 25% di e tráfiko di pasahero. Tráfiko di pasahero den yanüari lamentablemente a baha ku -32% kompará ku desèmber 202. Febrüari a mira un oumento di +43% kompará ku yanüari, i den mart tráfiko a baha ku -8% kompará ku febrüari.

Sur- Amérika a mustra un rekuperashon debil i mas slo ku a pronostiká. Reanudashon di servisio aéreo di nos partner den aerolínea a ser planiá pa otro fecha òf a keda posponé. Ku mayoria di e paisnan di Sur- Amérika será pa tráfiko di pasahero internashonal, aerolíneanan ta pèrdè e entrada di pasaheronan for di paisnan importante manera Brazil, Argentina, Chile i Perú. E ‘overall average load factors’ pa luna di yanüari pa mart tabata 55%, 55% i 69% respektivamente. Rekuperashon di tráfiko kompará ku 2019 tabata 19% den yanüari, 22% den febrüari i 29% den mart.

Segun Airports Council International (ACI), ta ferwagt ku tráfiko internashonal di pasahero lo keda debil den e promé mitar di 2021. Sinembargo, tin señalnan kaba ku ta mustra ku lo tin un oumento signifikativo den e demanda di biahe aéreo pa e di dos mitar di 2021, segun ta mira un subida den e kantidat di personanan ku a bakuná i ku restrikshonnan pa biahe ta keda gradualmente suavisá. Biahenan doméstiko den Merka i Oropa ta biniendo bèk mas lihé ku esnan internashonal, segun e gruponan mas grandi di personanan bakuná ta biaha pa bishitá famianan i amigunan. Adishonal, e rekisitonan pa drenta ta varia pa kada destinashon internashonal, influensiando desishonnan di biahe.

“Tráfiko ta keda sumamente difísil pa pronostiká, i e impakto finansiero ta severo. Sinembargo, nan ta mira un rekuperashon den e di 2 kuartal. No solamente debí na e esfuersonan pa ku bakunashon rònt mundu, si no primera mente debí na e programa di bakunashon ku ta keda ehekutá na Kòrsou kual lo trese pronto e protekshon na nan poblashon i transformá e isla den un destinashon seif. E seguridat pa ku salú lo influensiá e desishon di biahe i nan ta spera ku e industria di turismo lo prosperá den direkshon di fin di aña”, co-CEO di CAP, señor Paulo Mazzali a indiká.