Kantidat di kaso diario positivo raportá na Kòrsou último lunanan. Por mira oumento den kaso nobo kousá pa e variante Delta for di fin di yüni.

PUNDA- Kantidat di kasonan di infekshon ku e vírùs di SARS-CoV-2 ta sigui oumentá den e parti di Karibe Hulandes (CAS i BES). Den periodo di un (1) siman un total di 777 persona a risibí un resultado positivo pa Covid-19 na e islanan, di kual mayoria ta na Kòrsou i Aruba.

Aruba
Kasonan di infekshon ku Covid-19 a oumentá mas ku dòbel na Aruba den e siman ku a pasa. Den e siman di 22 pa 29 di yüli, 183 persona pa kada 100.000 habitante a risibí un resultado positivo pa Covid-19. E siman promé, te ku 22 di yüli esaki tabata 66 pa kada 100.000. persona. Aktualmente tin 6 persona hospitalisá, di kual un persona den kuido intensivo.

Segun análisis kondusí pa RIVM 30% di e kasonan positivo ta serka personanan di 15 pa 24 aña. Mayoria, 75%, ta serka personanan ku no a bakuná i 7% ta personanan no kompletamente bakuná. Esaki Promé Minister Evelyn Wever-Croes a duna di konosé den rueda di prensa djabièrnè 30 di yüli. Ademas, prueba di muestranan ta indiká ku mayoria kaso ta kousá pa e variante Delta.

Pa loke ta trata medidanan, Gobièrnu di Aruba ainda no lo implementá ningun medida severo. Lokual ku si ta kambia ta ku awor Aruba ta konsiderá Merka tambe komo pais di riesgo haltu meskos ku Hulanda i Colombia. Esaki ta nifiká ku entrante 1 di ougùstùs tur pasahero ku ta bini for di pais di riesgo haltu mester tèst, sea ku nan ta bakuná òf no.

Boneiru
Na Boneiru kasonan di infekshon ku Covid-19 a redusí kompará ku e siman anterior. Den e siman di 22 pa 29 di yüli a raportá 65 kaso positivo pa kada 100.000 habitante. E siman promé ku 22 di yüli esaki tabata 95 pa kada 100.000 habitante. Na Boneiru tambe e variante Delta ta dominá pa loke ta trata infekshon ku Covid-19.

Kòrsou
Durante e siman ku a pasá Kòrsou a raportá 295 persona positivo pa kada 100.000 habitante, esaki ta redukshon leve kompará ku e siman promé kaminda a registrá 305 kaso positivo pa kada 100.000 habitante.

Segun análisis di RIVM 42% di kasonan positivo ta bou di personanan di 15 pa 24 aña, di kual mayoria no ta bakuná òf no ta kompletamente bakuná. Manera ta konosí, mayoria kaso di infekshon ta kousá pa e variante Delta. Ademas, muestranan ta indiká ku aun tin infekshon lokal kousá pa e variante Alpha, anteriormente yamá variante britániko, i tambe a detektá kaso di infekshon kousá pa e variante B. 1.621 ku ainda no tin un nòmber segun alfabèt griego. E variante B. 1.621 a keda detektá pa promé bia yanüari 2021 i ta kategorisá komo variante di interes pa Organisashon Mundial di Salú (WHO). Te ainda e variante no ta unu sumamente preokupante kompará ku e variantenan Alpha i Delta.

Pa loke ta trata personanan hospitalisá dor di Covid-19, Gobièrnu di Kòrsou ta informá ku tin nuebe (9) persona interná di kual kuater (4) ta den kuido intensivo. Di e personanan hospitalisá shete (7) no ta bakuná i un persona a haña Covid-19 den ménos ku dos siman despues di a risibí su di dos bakuna.

Gobièrnu di Kòrsou a eskalá algun medida pa prevení transmishon di e vírus. Lo oumentá kontròl na evenemento nan di riesgo haltu, esaki ta enserá aktividatnan kaminda mas ku 250 persona ta presente òf evento kaminda no por garantisá sufisiente distansia sosial.

Sint Maarten
Publikashon di RIVM ta duna di konosé ku Sint Maarten a raportá 77 kaso positivo pa kada 100.000 habitante den último siman. Esaki ta un oumento kompará ku e siman promé ku 22 di yüli kaminda a raportá 63 kaso pa kada 100.000 habitante. E parti franses di e isla tin mas kaso kompará ku e parti hulandes. Aktualmente 2 persona ta hospitalisá pa motibu di infekshon ku Covid-19. Na Sint Maarten e variante Alpha ta e variante dominante, pero muestranan a detektá infekshon ku variante Delta tambe.

Manera ya ta konosí e islanan di Saba i St. Eustatius no tin ningun kaso aktivo ku Covid-19 ya pa algun luna kaba.