Willemstad. Den kuadro di e proyekto di UNESCO Trese Bo Tas (Caribbean Youth for Climate Change/Bring Your Own Bag) djaluna último ministernan Steven Croes i Quincy Girigorie a entregá na representantenan di e organisashonnan hubenil AGPNA (Asosiashon di Guia PNA), AJJC (Ambulante Justitiële Jeugdzorg), Atletiek Vereniging Trupial, JJIC (Justitieel Jeugdinrichting Curaçao) i Scouting Antiano e bòternan pa awa ku e meta pa sigui konsientisá  hòbennan riba otro alternativa pa uso di plèstik i konsientisashon di nos medio ambiente. Tantu Minister Croes komo Minister Girigorie a enfatisá e importansia di e proyekto ku ta siña nos hòbennan e balor di kuida nos medio ambiente.

E organisashonnan ariba menshoná ta forma parti di e komishon Trese Bo Tas huntu ku Komishon Nashonal UNESCO Curaçao. Banko Maduro & Curiel’s tambe ta un dje partnernan den ehekushon di e proyekto akí i mas aleu tin kolaborashon ku Meteo i Green Phenix.

Na sèptèmber 2019 a lansa e proyekto akí ku tin un durashon di dos aña. Na yüni pròksimo kordinashon di e proyekto di parti di Komishon Nashonal di UNESCO Curaçao ta terminá,  pero e gruponan partisipante ta sigui ku esaki den nan organisashonnan pa asina e proyekto bira unu duradero.

Kòrsou a bira e di dos pais, despues di Jamaica, ku a lansa e proyekto Karibense pa hòben Bring Your Own Bag /Trese Bo Tas. Ta trata akí di un kampaña di edukashon sosial i proyekto di kreashon pa kapasidat hubenil. Un proyekto ku ta stimulá rechaso di uso di plèstik den komunidat. E kampaña pues ta pa stimulá e hòben pa konsiderá otro alternativa, spesífikamente pa trese nan propio tas reusabel huntu ku nan ora ta bai kualke aktividat òf pa hasi diligensia.

E proyekto ta den su di dos fase aktualmente, kaminda e organisashonnan ta bai sigui haña training i workshop den e área di resiklahe. Ta bai kapasitá i praktiká ku e mucha i hóbennan den e áreanan di Kambio di Klima, Medio Ambiente, Redusí, Reusá i Resiklá na Kòrsou, Empresarismo i Obra di man ku materialnan di resiklahe.

Green Phenix i tambe Meteo a ofresé e gruponan e oportunidat pa por a bishitá e organisashonnan akí i esaki lo sigui pa e aña’kí tambe. Despues ku a bin ku varios medida den kuadro di  COVID-19, Meteo a bishitá varios grupo ku nan ekipo kaminda a splika e hòbennan tokante kambio di klima i kon esaki ta afektando mundu. E bishitanan ta sigui e aña aki tambe.

Meta prinsipal pues di e proyekto akí ta pa konisientisá e hòben pa kuida su medio ambiente i kaminda ta nesesario kana ku su propio tas i bòter pa awa pa asina no mester hasi uso di saku i kùp di plèstik. For di yòn mester kuminsá siña e importansia di kuida nos medio ambiente i pa asina esaki bira algo duradero. Komishon Nashonal UNESCO Curaçao ta spera ku lo tin mas organisashonnan ku ke implementá e proyekto den nan seno.