Willemstad—-Riba e pregunta ku un doño di trabou tin e poder pa obligá i òf pone un trahadó bai bakuna, abogado señor Bertie Braam a splika lo siguiente ku un doño di trabou tin e obligashon pa lei pa krea un sitio di trabou sigur pa su trahadónan mes i tambe un sitio sigur pa su klientenan ku ta bishita su establesimentu.
Awor aki nos ta den un pandemia kual mester tene kuenta kuné. Sr. Braam a sigui splika ku e úniko manera pa evitá e pandemia aki te ainda ta dor di wak pa e trahadónan pasa nan bakuna sino lo tin un problema. Segun sr. Braam e la tuma nota ku a bisa ku e trahadónan por bai hasi un PCR tèst tambe pa por traha pero un PCR tèst ta algu temporal. Den kaso si hasi un PCR tèst mes esaki no ta kita ku aki ratu bo no por ta positif.
Segun Braam den práktika di un negoshi no por usa un PCR tèst. Úniko metodo ku por usa den e kaso asina aki ta e bakunashon. Segun Braam si e sigui e kaso resientemente di e doño di trabou ku su trahadó e ta haña ku e doño di trabou no por bai asina leu di obligá e trahadó di bai tuma e bakunashon pero si den kaso ku e trahadó no kier tuma e bakunashon e doño di trabou tin derechi di bisé ku e no por drenta den su negoshi. Esaki kier men ku e por para e relashon di trabou entre di e doño di trabou i e trahadó i miéntras tantu ku e trahadó no traha e no ta haña pago tampoko esta e asina yama “ No work no pay”.
E abogado a sigui bisa ku mester kòrda si ku no por obligá niun trahadó di bai bakuna pero e doño tambe ta wak bienestar di su negoshi i su klientenan i den kaso asina ku e trahadó no kumpli ku e petishon di e doño di trabou e konsekuenshanan ta pa e trahadó mes.