Krematorio na India

PUNDA- WHO ta anunsiá ku a kambia klasifikashon di  e variante di Covid-19 ku a keda detektá na India. E variante di Covid-19 ku algun siman pasá ainda tabata kai bou di klasifikashon di investigashon, a bira un unu ta kai bou di kategoria “prekupashon global”.

Estudionan preliminar ku a keda hasí riba e variante detektá na India ta mustra ku e vershon aki di e vírus di Covid-19 ta plama mas fásil kompará ku e otro variantenan konosí. E variante di India, B.1.617, ya a plama na mas ku 30 pais inkluso Aruba I St. Maarten, esaki segun publikashon di WHO i RIVM. Tres (3) otro variante a keda klasifiká komo variantenan preokupante kual ta esun di Brazil, Suráfrika i e variante Britániko. Ku adishon di e variante Indio, awor mundu konosé kuater (4) variante preokupante di e vírus di Covid-19.

Motibu ku un variante ta bai di “variante di interes” pa “variante preokupante” ta ora tin sufisiente evidensia ku e variante ta kumpli ku mínimo di un di e siguiente kriterianan: e ta transmití mas fasil, e ta kousa enfermedat mas grave, e ta kousa neutralisashon redusí pa antikuerpo i redukshon di efektividat di bakuna. Por último asosiashon mundial di salú (WHO) ta segurá ku e bakunanan aprobá aktualmente ta efektivo kontra e variante di India tambe. Investigashonnan ta sigi pa tin mas konosementu riba komportashon di variante Indio i tambe pa averiguá si esaki ta e motibu responsabel pa e oumento di mortonan na India.