Willemstad—— Polis a haña nan ta detené un veterinario kual lo mester a hasi su mes kulpabel na un kaso di maltrato ku arma i òf intento di asesinato.

Djaweps 21 di mei 2020 alrededor di 17.31’or, Sentral di Polis a risibí informashon ku tabatin problema entre dos bisiña den Amerikanenkamp.

Pa mas o ménos 17.45’or, un hòmber a kore yega warda di polis Rio Canario ku herida di bala na altura di su garganta.

Mesora a pidi presensia di ambulans pa transportá e víktima pa sala di emergensia di C.M.C.  For di investigashon a  sali na kla ku e víktima ta un di e partidonan ku un ratu promé tabatin problema ku otro na Amerikanenkamp.

Seguidamente polis a bai na kas di e sospechoso, e hòmber P.C. de Geus di 52 aña di edat nase na Hulanda.  El a keda detené i a konfiská e arma di kandela ku el a usa.

A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon. Investigashon ku Vigilante a hasi na Mariniersweg unda e suseso a tuma lugá a bin sali afó ku e problema entre di e bisiña tabata pa un muraya di kura ku a ser konstruí. Tabata trata di dos muraya banda di otro di kual un di nan tabata mas haltu ku otro.  Dado momento kosnan a bira basta tenso unda e víktima esta esun ku a wòrdu tira mester a agredí e yu di e dòkter ku un pida palu. E tata esta e sospechoso e ora ei mester a bai paden i a kue un rifel ku kual e la tira e víktima ku esaki na altura di su garganta. E kaso ta den investigashon.