Karibe,- E barku di Marina Hulandes Zr.Ms. Holland durante e anochi di 10 pa 11 di yüni a interseptá dos transporte grandi di droga. Den Laman Karibe e barku di patruya pa Region Karibe, den un tempu kòrtiku a logra obligá un asina yamá ‘go-fast’ pa stòp.

Ámbos kapturashon di droga a tuma lugá apénas un par di ora despues di otro. Durante e promé persekushon e dos botonan rápido di Zr. Ms. Holland, e asina yamá FRISC, a keda desplegá. Sigun proseduranan e barku a keda ordená pa stòp. Despues di promé tirunan di atvertensha, al fin e boto a stòp, despues di a risibí tirunan dirigí riba e motornan.

Serka e tres personanan abordo a enkontrá un arma di kandela semi-outomátiko. Tambe a konfiská mas ku 700 kilo di kokaina. Un gran parti di esaki nèt promé ku e intersepshon ya kaba a keda tirá for di e boto go-fast i despues por a rekohé esaki ku e FRISC. Di e tres personanan a bordo, dos tin e nashonalidat Dominikano i unu nashonalidat Kolombiano.

Dòbel slá
Kòrtiku despues di e promé kapturashon atrobe a kanta bingo. Den mainta tempran un di dos go-fast a keda detektá. E boto aki tambe a ignorá diferente petishon pa stòp i un biaha mas a los tirunan di atvertensha. Finalmente e helikòpter marítimo NH90 tabata obligá pa tira dirigí riba e motornan.

Despues di esaki Zr.Ms. Holland pa medio di su dos FRISC-nan, ku tabatin a bordo un ekipo kombiná di Wardakosta Merikano i Kuerpo di Marina, por a detené e personanan ku tabata riba e go-fast i saka e droga for di laman. Ku e di dos kapturashon tabatin involukrá 585 kilo mas di kokaina. E tres personanan di e di dos boto tur tabatin nashonalidat Venezolano.

Pa motibunan di seguridat a disidí di tuma e sospechosonan a bordo. E sospechosonan di e kontrabanda mas despues a keda traspasá pa un barku di Wardakosta Merikano.

Tarea Konstitushonal
Zr.Ms. Holland ta aktivo komo Barku di Patruya pa Region Karibe desde mei di 2021 den e region. E barku di Marina ta bon ekipá pa operashonnan anti-droga. E mantenshon di e órden legal internashonal ta un di e tareanan Konstitushonal di Defensa.