Hato— E aña aki alrededor di 204 bekado a bai  Hulanda pa asina por kuminsa  ku nan estudio nobo. Ayera a parti e grupo unda ku mainta a bai 94 studiante i mèrdia a bai 96 miéntras ku e sobra nan ya a  reparti pa Hulanda. Por a tuma nota ku tabata un momentu basta emoshonal pa famianan i konosínan di e bekadonan.

Ayera na Curaçao International Airport bekadonan a despedí di nan mayornan, famianan, amigunan i konosínan pa asina por a subi buelo pa Hulanda. E bekadonan aki a wòrdu repartí den grupo unda ku den ora nan di mainta 9 un grupo a bai i mas mèrdia  e otro parti di e  grupo a bai. Ta trata aki di 204 bekado ku a subi buelo pa Hulanda.

Durante e proseso na airport por a tuma nota ku e hóbennan tabata drenta paden den un grupo di 10 pa asina por a bai “check-in” i despues por a bai pafó bèk serka nan ser kerínan pa despues despedí di nan. Por a tuma nota ku tabata un momentu basta emoshonante pa tantu e bekado komo nan ser kerínan.

E tim di SSC tabata presente i Minister di edukashon Sithree van Heydoorn ku tambe a subi buelo huntu ku e studiantenan rumbo pa Hulanda. Basta di e studiantenan a mustra di tabata poko nervioso mirando ku ta un stap grandi nan ta bai dal den nan bida. E stap unda ku nan lo mester bai bandoná nan ser kerínan i bai biba leu for di nan i riba nan mes.

Sra. Chirino di SSC tambe a hiba algun palabra unda ku e la splika i konta mas di e proseso ku e studiante nan mester a kana i lo sigui despues di ku nan yega Hulanda. Segun sra. Chirino tabata un proseso basta largu mirando ku nos tabata den un pandemia. Tabata na luna di Novèmber ku e studiantenan por a kuminsá apliká pa asina por a bai kuminsá ku un estudio na Hulanda.

Di parti di SSC nan a kontrolá tur petishon i bisa nan kiko nan tabata falta pa asina tur kos tabata na òrdu promé ku e dia di ayera yega. Tambe nan a duna nan informashon di kiko tur nan lo haña for di finansiamentu di SSC i DUO i kon e trámitenan ta kana.  Aparte di esaki e studiantenan a haña vários seshon di informashon riba tur área pa asina por a prepará nan pa na momentu ku nan yega Hulanda. Nan a haña seshon di informashon i training serka Banko Sentral, di kon pa manehá ku nan sèn i situashon i/ òf modelo finansiero aya na Hulanda.  Nan a risibí seshon di informashon serka seguro tambe i vários otro seshon mas pa asina por a prepará nan mas tantu promé ku e dia di ayera unda ku nan mester a parti.

Segun sra. Chirino e aña aki por a tuma nota ku e suidat di Eindhoven tambe a resaltá i esaki ta pa promé biaha. E la indiká ku normalmente e studiantenan semper ta skohe pa por bai studia sea na Rotterdam, Amsterdam òf Den Haag pero e aña aki por a mira ku tabatin basta studiante ku a skohe pa bai Eindhoven. Normalmente ta 9 pa 12 studiante sa skohe pa por bai sigui estudio na Eindhoven pero e aña aki nan a risibí un kantidat di 27 studiante.

Na momentu ku e bekadonan yega airport na Hulanda kada nan lo haña un mentor kende ta esun ku lo guia i duna nan tur informashon nesesario. E mentor ta esun ku lo risibí nan i bai den bus pa asina kore yega e suidat kaminda nan lo bai biba. Na nan yegada na e suidat e mentor lo mustra nan unda nan ta bai biba i tambe instruí nan di e suidat. Tambe nan lo por topa ku studiantenan bieu ku ya a akomodá aya nan i ku lo duna nan sierto tep nan i informashonnan ku nan mester.