Back to Top
Responsive image
E korant di pueblo

Dama ku tabata wòrdu sospecha komplisidat kaso dòbel asesinato atrobe dilanti wes


May 23, 2020 • 2 minüt pa lesa

WILLEMSTAD,— Djaluna awor wes ta pendiente pa tratamentu kaso penal kontra e dama R.C. kende tabata wòrdu pèrsiguí kaba pa Ministerio Públiko den un otro kaso, kual el a keda deklará liber i awor ta bai para responsabel pa droga ku lo e tabatin den su poseshon na momentu ku e kier a bandoná nos pais via aeropuerto Hato.

E dama R.C. lo ta huntu ku su abogado djaluna awor pa un kaso penal ku tin kontra dje, despues ku lo e la keda gará den poseshon di droga, na momentu ku e kier a biaha. Ta trata aki di un hóben ku ya tabatin problema ku hustisia na aña 2016/17 den un kaso unda lo tabata sospech’é di ta kómplise di poseshon arma kandela den un dòbel asesinato.

E dama a splika ku e no tin nada di aber ku e kaso dòbel asesinato The Alley kual e la asta indiká ku e no tabata sa mes ku tin arma kandela den e tas ku el a transportá di un kaminda pa otro. Tur esaki despues ku el a bisa ku e pidié un fabor i no tabata masha bon na altura di e plan ku e otro persona nan tabatin. Den e kaso aki wes no por a proba ku e dama lo tabata sa òf tin di aber ku transporte di e arma kandela, ku a sirbi pa kita bida di 2 persona den e diskoteka na aña 2016.

No muchu tempu despues, esta awor den aña 2020 e dama mester para dilanti wes pa un otro kaso penal ku tin kontra, unda awor ta sospech’é di a trata na pasa droga, esta ku e tabatin esaki den su poseshon na momentu ku e kier a biaha via aeropuerto. Djaluna awor e dama mester presentá den ora nan di mèrdia palasio di hustisia, unda aki lo e mester bai para responsabel pa e akusashon di trafikashon di droga.

Lo e mester presentá huntu ku su abogado mr. Larmonie, miéntras fiskal mr. Rienhart-Martis lo ta esun enkargá ku e petishon di kastigu kontra di dje. Finalmente wes mr. Gruijters lo mester disidí si ta haña probá ku e la kometé e echonan i ku si por yega na un kondena hustu pe.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.