Back to Top
Responsive image
E korant di pueblo

Hòmber a kue zùster tene ora a kaba di pas’é angua


June 30, 2020 • 2 minüt pa lesa

WILLEMSTAD,—- Korte a trata e kaso kontra Liyandel A. kende na momentu ku su karson tabata abou lo el a kue zùster tene i bis’é pa e dun’é un sunchi. E kaso no por a yega un final mirando ku tabata falta mas informashon. Tabata 5 mart ora a presentá na kas di e sospechoso ku a pas’é angua na su parti patras, na momentu ku su karson i bòkser tabata na su rudia, ku el a bira i kue e zùster brasa. E sospechoso a bisa e zùster ku ta mucha yòn e ta i ku e tin ku dun’é un sunchi promé ku e bai. E zùster despues di a pasa den sustu di su bida mesora bai hasi un denunsia mirando ku Liyandel no kier a lag’é bai.

Liyandel kende tin ku para responsabel pa un kaso inmoral a indiká ku e zùster en bèrdat a presentá pa pas’é angua na su parti patras i ku el a bira ku e zùster brasa i pidié pa un sunchi. Segun e sospechoso ku su man a pasa banda di parti íntimo di e víktima pero e no a kue tene manera e víktima a indiká. Mas aleu el a bisa ku e no a mishi ku e víktima su pechunan i ku ta djis pidi el a pidié un sunchi i despues el a lag’é bai.

 E víktima a indiká ku e tabata hopi spantá na momentu ku e sospechoso a mishi kuné mirando ku ora e kier a resistí Liyandel a keda pèrsiguié i tabata keda kue su mannan tene. Mas aleu el a splika ku ora e la logra kore bai laga e sospechoso, e hòmber lo a zuai ku su kosnan. E dama víktima a splika ku e sospechoso tabata den un vèn ku nan tin pa kore duna servisio na kas i ku e no por a drenta e vèn mirando ku e akusado tabata ei den i e tabatin miedu pa e mesun kos bolbe pas’é.

El a bisa ku Liyandel a bis’é ku e ta mucha yòn i ku e tin hasi tur kos pe. E kaso no por keda tratá kompletamente ayera den korte debí ku tantu wes komo fiskal tabata haña ku falta informashon i ku no por sigui ku e kaso si falta asina tantu informashon. E kaso a keda posponé pa 24 yüli próksimo unda riba e fecha aki lo pidi kastigu i probablemente asta tuma desishon di e kaso. Fiskal a pidi pa e sospechoso keda será tanten e investigashonnan  ta kaba, mirando ku e kaso ta unu basta delikado i por tin konsekuensia ku e mesun kosnan por bolbe pasa si e sospechoso rekobrá su libertat i no tin un solushon pa ku e kaso.

Login
Bo a pèrdè bo password? Porfabor hinka bo username òf email address. Nos lo manda bo un link via email kaminda bo por kambia bo password.