Back to Top
Responsive image
E korant di pueblo

Komunikado: S.Q. detené na Dubai


November 26, 2020 • 2 minüt pa lesa

Punda– Awe 26 di novèmber, a detené e sospechoso yu di Kòrsou S.Q. na Dubai. Un unidat spesial di polis na Dubai a ehekutá e detenshon. Esaki na petishon di Ministerio Públiko di Sint Maarten.

Ta sospechá S.Q. di ordená vários likidashon, sekuestro, enkabesá un organisashon kriminal i labamentu di plaka. E echonan lo a wòrdu kometé den vários pais den Reino i pafó di esaki.

E Sospechoso

Hustisia tabata buska S.Q. hopi tempu kaba. Un aña pasá un tim konhunto a kuminsá investig’é. E tim di investigashon spesial formá aki ta konsistí di miembronan di kuerponan polisial di Sint Maarten, Kòrsou, Aruba i Recherche Samenwerkingsteam (RST). E tim ta kai bou di e liderazgo di Ministerio Públiko di Sint Maarten i Ministerio Públiko di Kòrsou. E koperashon intenso polisial internashonal aki ku vários servisio di investigashon mundial a kondusí na su detenshon awe na Dubai.

Koperashon

E mando responsabel di Kuerpo Polisial di Kòrsou, Kuerpo Polisial di Sint Maarten, Kuerpo Polisial di Aruba i Polis Nashonal Hulandes ta gradisí e koperashon agradabel i eksitoso ku e outoridatnan di Emiratonan Árabe Uní (EAU). E mando di RST i Ministerio Públiko di Sint Maarten i di Kòrsou tambe ta satisfecho ku e resultado. E organisashonnan ku a kolaborá konhuntamente ta deklará lo siguiente: “Ku e detenshon di S.Q. a dal un paso importante den e investigashon. Ku esaki ta yega mas serka di e resolushon di vários likidashon, logrando hustisia pa e víktimanan i nan famia. Aunke ku S.Q. no tabata biba ni na Kòrsou ni na Sint Maarten, su influensha a keda grandi den e paisnan aki. Esaki dor di su supuesto ret kriminal mundial. Presentemente Ministerio Públiko di Kòrsou ta solisitá su ekstradishon. E proseso di ekstradishon aki por tuma algun tempu, ya ku Reino Hulandes no tin un tratado di ekstradishon ku Dubai. Despues di e detenshon di S.Q. na Dubai entradanan hudisial a tuma lugá na vários sitio. Asina a realisá entradanan hudisial na Kòrsou i Hulanda tambe. Den e temporada benidero e investigashon lo kontinuá i mas detenshon no ta ser ekskluí.

Es ku tin informashon ku por yuda e tim di investigashon por tuma kontakto ku e tim via di e siguiente numbernan di telefòn/Whatsapp: +5999 521 3865 (Kòrsou) òf +1 721 586 5052 (Sint Maarten). Es ku ta preferá di keda anónimo por kompartí informashon dia di e siguiente liña di tep (tambe Whatsapp): +5999 679 2896 (Kòrsou) o +1 721 553 0561 (Sint Maarten)

Login